Խթման տօնակատարութիւն Թէքէեան Տան մէջ
Քրիստոսի յարութեան տօնը մարդկութիւնը կը յուսադրէ, այս հանգրուանին վերապրելու եւ գարնանային պայծառ արեւով վերածաղկելու գաղափարին:
Այս առումով Խթման երեկոյին Թէքէեան Մշակ. Միութեան տունն զգեցած էր բոլորովին նոր երեւոյթ մը շնորհիւ Մեղրի Գույումճեանի արհեստավարժ աշխատանքով պատրաստած, օրուան տօնին պատշաճ առինքնող յարդարանքին:
Վարչութեան ժրաջան փոխ ատենապետուհին՝ Ցոլինէ Մուղալեան, Ռամկավար Ազատական Կուսակցութեան եւ Թէքէեան Մշակ. Միութեան վարչութեան անունով բարի գալուստի ջերմ խօսքերով ողջունեց ներկաները եւ շնորհաւորեց բոլոր Յարութիւն անունը ունեցող հիւրերը:
Գեղեցիկ յարդարումով սեղաններու շուրջ բոլորը հաւաքուած ընտանիքներու ուրախ զրոյցներուն յաջորդեցին, Վիվիկին կողմէ պատրաստուած ճոխ աղանդերները, ապա համեղ աւանդական ձկնեղէնները:
Առանց յապաղումի Dj. Anto-ի խանդավառ նուագով եւ հայկական թէ օտար պարեղանակներով, երիտասարդներու պարերը ընթացք առին եւ պարահարթակը անընդհատ լեցուն մնաց մինչեւ գիշերուան ուշ ժամերը:
Դադար մը տալով խրախճանքին խօսք առաւ Վարչութեան հաւատաւոր անդամներէն պրն. Յարութիւն Գույումճեան:
«Սիրելի ներկաներ,
Յուսամ լաւ ժամանակ կանցնէք, միայն մի քանի վայրկեանի համար ձեր ուշադրութիւնը կը խնդրեմ, շատ կարեւոր յայտարարութեան մը համար.
Տարիներով սովորութիւն դարձած է Մոնթրէալի Թէքէեան Մշակ. Միութեան համար, ամէն տարի այս օրը Խթման գիշերուան տօնախմբութեան ատեն պարգեւատրել անձ մը զայն անուանելով «տարուան անձնաւորութիւնը» փոքր յուշատախտակ գնահատագիրով մը: Այս տարի բախտը կ’ունենանք երկու տարի բացակայութենէ ետք, կրկին շարունակելու մեր սովորոյթը.
– Ծանրակշիռ եւ հաստատ քայլերով, միշտ կը մտնէ Թէքէեան կրնամ ըսել ամէն օր, միշտ ծրար մը թեւին տակ.
– Ծայր աստիճան համեստ – մտահոգ եմ հիմա որ իր համեստութիւնը կը վիրաւորեմ.
– Եղած է պատանեկութենէն ազգային գործերու նուիրուած անձ, վարած է Թ. Մ. Միութեան ատենապետի պատասխանատու պաշտօնը.
– «ԱՊԱԳԱՅ» շաբաթաթերթի գլխաւոր սիւն.
– Տարիներէ ի վեր մեր տարեգիրքի պատրաստութիւնը մինակը ուսերուն վրայ առած է:
– Խորհրդատու բոլոր վարչութիւններու. յաջողելու քաղցր գաղտնիքը լման իւրացուցած, կ’ուղղէ ու կը նաւարկէ ձեռնարկները իրենց յաջողութեան հասցնելու:
«Տարուան անձնաւորութիւն» անուններու ցուցակը երկար էր այս տարի եւ արժանիքները շատ, – ըսաւ պրն. Գույումճեան,- բայց ժողովը միաձայնութեամբ ընտրեց Վերոյիշեալ արժանիքներով օժտուած պրն. Պերճ Գոգորեանը»:
Ներկաներու յոտնկայս ծափահարութիւններով յանձնուեցաւ «գնահատագիր յուշատախտակ»ը, ծաղկեփունջով մը պատուեցաւ տիկին Մարի Գոգորեան:
Պրն. Գոգորեան, իւրայատուկ համակրելի ոճով, շնորհակալութիւն յայտնեց եւ քաջալերեց գործունեայ վարչութեան տարած լուրջ աշխատանքը:
Շարունակուեցաւ խրախճանքը, իսկական տօնախմբութեան մը վայելքը ըմբոշխնեցին ներկաները:
Բախտաւորներ ստացան արժէքաւոր նուէրներ, յատկացուած Վիգէն Խորասանճեանէն, Մայքըլ Ամբարձումեանէն եւ Ճոն Պոյաճեանէն, որուն արուեստի գործերը եւս ցուցադրուեցան:
Այս առիթով կը շնորհաւորենք ներհուն բանաստեղծ «Ապագայ» շաբաթաթերթի հարցազրոյցներու վարիչ, ընթերցողներու կողմէ իր գրութիւններով փնտռուած պրն. Պերճ Գոգորեանը:
Հայ ազգային եւ մշակութային կեանքը վառ պահող Ռ.Ա.Կուսակցութեան եւ Թէքէեան Մշակ. Միութեան վարչութիւններուն, կը մաղթենք յարատեւ կորով իրենց նուիրական առաքելութեան մէջ:
Վ. Պալեան
