Հաղորդագրութիւն
Թէքէեան Մշակութային Միութեան «Տոքթ. Նուպար Պէրպէրեան Հիմնադրամ»ի Տնօրէն Խորհուրդը յայտարարեց 2022 տարեշրջանի համար կրթաթոշակի արժանացած համալսարանականներուն անունները:
Այսպէս՝ Minnesota Twin Cities համալսարան յաճախող քաղաքական գիտութիւններու ճիւղին հետեւող Դաւիթ Ազիզեանին (ծնած Ծովաբեր գիւղ, Հայաստան) եւ University of Maryland համալսարանը յաճախող միջազգային օրէնսդրութեան ճիւղին հետեւող Անի Մկրտչեանին (ծնած Երեւան):
Հանրայայտ լրագրող եւ խմբագիր Տոքթ. Նուպար Պէրպէրեան կը մահանայ Նոյեմբեր 23 2016-ին: Ան իր թողօնը կը յանձնէ Թէքէեան Մշակութային Միութեան: Միութեան Կեդրոնական Վարչութիւնը ի յիշատակ ողբացեալին կը հաստատէ անձեռնմխելի հիմնադրամ մը «Տոքթ. Նուպար Պէրպէրեան» անունով: Նմանապէս այս տարի լոյս ընծայեց բարերարին հրապարակագրական գործերէն ծաղկաքաղ հատոր մը՝ «ՌԱԿի Անխոնջ Խմբագրապետ»ը, թողելով մնայուն արժէք մը լրագրական կեանքէն ներս, խմբագրութեամբ՝ Յակոբ Վարդիվառեանի:
Այս տարի հինգերորդ տարին է որ կը շնորհուի կրթաթոշակ միջազգային իրաւաբանութեան եւ քաղաքականութեան հետեւող հայ համալսարանական ուսանողներու:
2023 թուականի թեկնածուներ կրնան կապ հաստատել ԹՄՄի Տնօրէն Խորհուրդին հետ կապուելով՝ TCADirector@aol.com
