Ամէն տարի Յունիս ամիսը կը համընկնի Lobster-ի եղանակին: Իսկ մենք կարծես, լարուած զսպանակներ, սրելով մեր ախորժակները, անհամբեր կը սուրանք հոն՝ ուր սպասարկութիւն տեղի կ’ունենայ «Lobster»-ի, մանաւանդ Թէքէեան Մշակութային Միութեան կազմակերպած ճաշկերոյթին, որ աւելի քան պատուասիրութիւն մըն է:
Փորձառու ուտողները գիտեն ինչպէս յարմարագոյն ձեւով մաքրել ու պատրաստել հպարտութեամբ կը բացատրեն անվարժներուն, իսկ այս վերջինները, աւելի կարծես պայքար մըն է որ կը մղեն…խաղաղ ու ախորժաբեր պատերազմ մը… այդ խեղճ «Lobster»-ներուն դէմ:
Ուրբաթ օրերու ընկերային հաւաքոյթներու առիթով, 23 Յունիս 2023-ին, վարչութեան աշխոյժ անդամները կը սպասարկէին համեղ «Lobster»-ներ, ինչպէս նաեւ ճաշի մասնակցողներուն յանձնելով գոգնոցներ ու ձեռնոցներ, աւելի հեշտ դարձնելու համար «Lobster»-ը մաքրելու դժուարին գործողութիւնը:
Ուրբաթօրեայ այս ընկերային հանդիպումները առիթ կու տան մեր առօրեայ աշխատանքէն ու մտահոգութիւններէն ձերբազատուելու եւ հանդարտ ու խաղաղ շաբաթավերջ մը վայելելու:
Շնորհակալութիւններ Թէքէեան Մշակ. Միութեան ժրաջան վարչութեան եւ բոլոր աշխատանքին մասնակցողներուն, որոնք ոչինչ կը խնայեն գոհացում տալու համար իրենց սիրելի շրջանակին:
Ներկայ մը
