Քանի մը ամիս առաջ լոյս ընծայուեցաւ Մոնթրէալաբնակ Ներկիզեան գիտնական եղբայրներու ֆրանսերէն լեզուով պատրաստած դասագիրքը, որ թէ՛ hամալսարանական ուսանողներու եւ թէ հետազօտութիւններ կատարող մասնագէտներու կը հայթայթէ համակարգչային օժանդակութեամբ հիմնական գիտելիքներ եւ ելեկտրականութեան ճարտարարուեստի նորագոյն կիրարկումներու մանրամասն տեղեկութիւններ, բարդութիւններ կանխելու եւ դժուարութիւններ յաղթահարելու միջոցներ:
Աւելի քան իննը հարիւր էջերէ բաղկացած եւ մանրամասն բացատրական նկարներով ճոխացած այս գիրքը ունի նաեւ մօտ 300 էջերու բաժին մը՝ գործնական օրինակներով, հարցերու լուծումի որպէս վարժութիւններ:
Փրոֆ. Շահէ Ներկիզեան դասախօս է École Polytechnique de Montréal-ի մէջ: Նոյն հաստատութենէն Engineering-ի աստիճանով շրջանաւարտ ըլլալէ ետք, Մգ Կիլ համալսարանէն ստացած է Մէթրիզի վկայական եւ ապա INRS-էն ստացած է Դոկտորային աստիճան Télécommunications-ի ճիւղին մէջ:
Փրոֆ. Վահէ Ներկիզեան կը դասաւանդէ Մոնթրէալի École de technologie supérieure-ի մէջ: Engineering-ի աստիճան ստացած է École Polytechnique de Montréal-ի ելեկտրական ճարտարարուեստի բաժնին մէջ եւ Մէթրիզի վկայական Մգ Կիլ համալսարանէն ու ապա Դոկտորայի աստիճան Մոնթրէալի Գոնգորտիա Համալսարանէն Microsystèmes-ի ճիւղին մէջ:
Կը շնորհաւորենք մեր սիրելի փրոֆէսէօրները այս նոր նուաճումին առիթով եւ կը մաղթենք շարունակական յաջողութիւններ իրենց մասնագիտական ասպարէզին մէջ:
«ԱՊԱԳԱՅ»
Յաւելեալ մանրամասնութիւններու համար կարելի է այցելել հետեւեալ կայքէջը՝
http://www.presses-polytechnique.ca/fr/circuits-electriques-des-fondements-aux-applications
