Մէկ կողմ ձգելով ոճիրներն ու մարդասպունութեանց դէպքերը, որոնցմով լի են տեղեկատուական ցանցերը, Հայաստանի մէջ շաբաթ չ՛անցնիր, ուր չլսենք անձնասպանութեան մը մասին` կամ տան առաստաղէն ինքզինք կախելով, կամ Քիեւեան կամուրջէն նետուելով…
Սովորաբար տղամարդիկ են զոհերը, երիտասարդներ, երբեմն ալ հասուն տարիքի: Երիտասարդները, հաւանաբար սիրային յուսախաբութեան պատճառով, մեծերը, դարձեալ հաւանաբար, պարտքերու տակ կքած ըլլալով ու անձնասպանութենէն բացի այլ ելք չգտնելով:
Հակառակ կրկնուող այս լուրերուն, ամէն անգամ որ լսեմ, ցնցում մը կ՛ապրիմ, ոչ միայն սպանութեան լուրի ընկալումին պատճառով, այլ անձնասպանութեանց պատճառներուն ու մեր երիտասարդներուն կեանքէն հեռանալուն համար:
Անցեալ Ապրիլի պատերազմին հարիւրէ աւելի երիտասարդ զինուորներ կորսնցուցինք. ասոնց վրայ բարդեցէք ճանապարհային վթարներու զոհերն ալ ու հաշուեցէք թէ մէկ տարուան ընթացքին քանի՞ երիտասարդ կորսնցուց Հայաստանը:
Ազգի մը ապագան երիտասարդներուն ձեռքն է, իսկ մենք անդադար կը կորսնցնենք զիրենք: Արդեօք այս հարցը լուրջ քննութեան եւ ուսումնասիրութեան առարկայ կը դառնա՞յ:
Քանիցս ակնարկուած է Հայաստանի մէջ երիտասարդներու թիւի նուազեցման մասին, բաղդատած երիտասարդուհիներու գերակշիռ թիւին, Ռուսաստան ու այլ երկիրներ գաղթած, կամ աշխատանքի համար երկիրը լքածներուն պատճառով, սակայն երկրին սպառնացող ընկերային այս աղէտին մասին մտածող կա՞յ:
Իմ կարծիքովս հարցը շատ լուրջ է եւ վտանգաւոր: Ընկերաբաններ, հոգեբաններ, տնտեսագէտներ… մէկ խօսքով` պետութիւնը հետաքրքրուա՞ծ է այս հարցով, վիճակագրական քարտէզ մը կա՞յ ցոյց տուող, թէ տարուէ-տարի որքա՛ն կը պակսի երիտասարդութեան քանակը:
Յուսահատ մարդոց հարցերը քննարկելու եւ անոնց օգնելու խորհրդատու մարմին մը կա՞յ: Հազիւ ինքնաշարժ վարել սորված, անզուսպ, խենթ ու խելառ տղոց սանձարձակութեան սահման դնող կա՞յ, նոյնիսկ իշխանաւոր մարդոց զաւակներուն:
Մէկ խօսքով, մեր երիտասարդներուն ուշադրութիւն դարձնող կա՞յ: Ծնողները շատ յաճախ անօգնական վիճակի մէջ են եւ չեն յաջողիր իրենց պատանի կամ երիտասարդութեան սեմին կանգնած զաւակներուն խօսք հասկցնել, ուրեմն ո՞վ իր վրայ պիտի առնէ այս հարցին պատասխանատուութիւնը:
Այսօրինակ խնդիրներ հիմնական լուծումի կը կարօտին, պատճառները արմատախիլ ընելու է, միայն պատճառներուն հետեւանքները հաշուեյարդարի ենթարկելով գոհանալու չէ: Ասոր համար, ինչպէս վերը յիշեցի, մասնագէտներէ բաղկացած յատուկ յանձնախումբեր կազմուելու են` պայքարելու համար թմրամոլութեան, յուսահատութեան եւ այլ վնասակար ախտերու դէմ:
Այս երկիրը կը կարօտի ապագայի ԼԱՒ ղեկավարներու, առողջ, հայրենասէր, առաքինի… Որպէսզի կարենան Հայաստանը պահպանել եւ ծաղկեցնել ու ժողովուրդին ալ բարօր կեանք մը ապահովել:
Յակոբ Միքայէլեան