ՌԱԿ սփիւռքի բոլոր ազդեցիկ կառոյցներն ու անձնաւորութիւնները, կողմ են արտայայտուել «Ծառուկեան» դաշինքին մաս կազմելուն.
ՌԱԿ ՄԱՄԼՈՅ ԴԻՒԱՆ
Երեկ էլեկտրոնային որոշ լրատուամիջոցների կողմից, ինչպէս միշտ՝ առանց ստուգելու տեղեկատւութեան աղբիւրի օրինականութիւնը, տարածուեց Ռամկավար Ազատական կուսակցութեան անունով հանդէս եկող մի խմբակի յայտարարութիւնն այն մասին, թէ իբր սփիւռքի ՌԱԿ-ը դէմ է եւ չի լիազօրում ՌԱԿ հայաստանեան կառոյցի մասնակցութեանը ընտրութիւններին։
Ռամկավար Ազատական կուսակցութեան Կենտրոնական վարչութիւնը հարկ է համարում յայտարարել, որ յիշեալ խմբակը, ընդդիմադիր եւ ինքնակոչ մի կառոյց, չի կարող հանդէս գալ ՀՀ Սահմանադրութեան, ՀՀ կուսակցութիւնների մասին օրէնքի եւ ՌԱԿ կանոնադրութեան համապատասխան գրանցուած եւ գործող աւանդական կուսակցութեան անունից, բացառապէս որի իրաւասութեան ներքոյ է գտնւում մասնակցել ՀՀ համապետական ընտրութիւններին, որի համար նա ոչ մի պարտաւորութիւն չի կրում իր դիրքորոշումներն ու քայլերը համաձայնեցնել արտաքին որեւէ կառոյցի, այս պարագայում՝ վերոյիշեալ խմբակի հետ։
Այդ խմբակը, Երեւանից հեռակառավարուող ցուցումներով փաստօրէն փորձում է միջամուխ լինել Հայաստանի ներքին գործերին։
Յայտնում ենք, որ վերոյիշեալ խմբակը, որը ոչ մի պետութեան եւ միջազգային ոչ մի կազմակերպութեան կողմից ճանաչուած չէ, այսպիսով փորձում է ուղղորդել եւ կոպտօրէն խախտել ՀՀ օրինականութիւնը։
Հարկ ենք համարում նշել նաեւ, որ ՌԱԿ սփիւռքի բոլոր ազդեցիկ կառոյցներն ու անձնաւորութիւնները բարոյապէս, շեշտում ենք՝ բարոյապէս, կողմ են արտայայտուել Հայաստանում ՌԱԿ դիրքորոշումների վերաբերեալ, ի մասնաւորի՝ «Ծառուկեան» դաշինքին նրա մաս կազմելուն, որի կապակցութեամբ յայտարարութիւններն ու հաղորդագրութիւնները ՌԱԿ Կենտրոնական վարչութիւնը ստացել է եւ կհրապարակի առաջիկայում։
ՌԱԿ ՄԱՄԼՈՅ ԴԻՒԱՆ
Երեւան, 5 Փետրուարի 2017թ.
