Արցախի Հանրապետութեան պաշտպանութեան նախարարութեան մամուլի ծառայութիւնը կը ներկայացնէ գիշերուան ընթացքին հակառակորդին կողմէ արեւելեան ուղղութեամբ ձեռնարկուած յարձակման փորձի մասին վկայող երկու տեսագրութիւն:
Առաջին տեսանիւթին մէջ ներկայացուած է Մարտունիի ուղղութեամբ՝
ա/ հակառակորդին հետախուզական խումբի ներթափանցման եւ հայկական ուժերուն կողմէ զանոնք վնասազերծելու գործողութիւնը
բ/ հակառակորդին կրած կորուստները (5 դիակ): Ըստ ՊԲ համապատասխան ծառայութիւններուն կողմէ ձեռք բերուած տուեալներուն` զոհուածներուն շարքին են Ատրպէյճանի Զինուած ուժերու 181-րդ ջոկատի հետախուզութեան պետ, մայոր Ապտուլաեւը, ջոկատի հետախուզական վաշտի հրամանատար, աւագ հարիւրապետ Աշիմլի Շախլարը, հետախոյզ Ատըհուսէյնովը ու եւս երկու զինծառայող, որոնցմէ մէկը` սակրաւոր:
https://www.youtube.com/watch?v=Dr7OufHMjDA
Երկրորդ տեսանիւթին մէջ կ‘երեւի Ակնայի ուղղութեամբ՝
ա/ հակառակորդին կողմէ ականազերծման «Տրոպա» տիպի զինամթերքի կիրառումը
բ/ հակառակորդին կողմէ կիրառուած նռնականետերու եւ խոշոր տրամաչափի այլ զինատեսակներու պայթիւնը
գ/ հակառակորդին հետախոյզներ խումբին նահանջը
Բացի տեսագրութիւններէն կը ներկայացնենք նաեւ հակառակորդին ճամբարին մէջ այսօր տեղի ունեցած հեռախօսազրոյցի հետեւեալ ձայնագրութիւնը:
https://www.youtube.com/watch?v=Isx4K4NyMd0
Այս ամէնը մէկ անգամ եւս կը փաստեն, որ այսօր առաւօտեան Ատրպէյճանի կողմէ` արցախեան զինուժի յարձակման մասին տարածուած տեղեկութիւնը ոչ այլ ինչ է, քան սեփական հերթական ձախողումը պատրուակելու անյաջող փորձ:
