Քրիստոս Ծնաւ եւ Յայտնեցաւ.

Քրիստոս Ծնաւ եւ Յայտնեցաւ.
Օրհնեալ է Յայտնութիւնն Քրիստոսի.
Մեզ եւ Ձեզ Մեծ Աւետիս.

Լոյս ի Լուսոյ ծագեալ ի Հօրէ.
և լուսաւորեաց զտիեզերս …
Կանոն Ծննդեան Քրիստոսի Բ աւուրն

Սիրելի բարեպաշտ հաւատացեալ ժողովուրդ
Գանատահայոց Տիրախնամ Թեմի

Վերստին Ամանորը եւ Ս. Ծննդեան տօները կը դիմաւորենք։
«Աստուած բազմապիսի ձևերով և այլազան օրինակներով նախապէս խօսեցաւ մեր հայրերուն հետ մարգարէներու միջոցով, այս վերջին օրերուն մեզ հետ խօսեցաւ Իր Որդու միջոցով» (Եբր. Ա 1-2): Ճշմարիտ Լոյսն անստուեր ծագեցաւ տիեզերքով մէկ՝ լուսաւորելու «ամեն մարդու, որ աշխարհ պիտի գայ» (Յովհ. Ա 9):

Անպատմելի և բերկրալի է մեր Փրկչի Սուրբ Ծննդեան խորհուրդը։ Ան, ով տիեզերքի Արարիչն է մեզ համար Իր Անձն ունայնացրուց ու խոնարհեցուց Ինքն Իրեն (Փիլիպ. Բ 7), որ անոնց բարիքներ շնորհէ Իր արարածներուն:

Անպաշտպան ու խնամքի կարոտ մանուկի մը պէս ներկայացաւ, որ նորոգէ յուսաբեկի յոյսը (Հռոմ. Ե 5), թերահաւատի՝ հաւատքը (Մարկ. Թ 23), եսակեդրոնի՝ ինքնուրաց սէրը (Յովհ. ԺԵ 13):

Հրեշտակներն ստուար բազմութեամբ Զօրութիւններու Տիրոջը կ՚օրհներգեն և մեզ երգակցելու կը հրաւիրեն, հսկում իրականացնող հովիւները կը շտապեն Աստուածածանօթ դառնալու և մեզ Փառքի Տիրոջը բարեբանելու կը կոչեն, տարածութեան ու անձկութեան առաջ չ՚ընկրկած մոգերն անթաքոյց ուրախութեամբ իրենց երախտագիտութիւնը կը յայտնեն Արդարութեան Արեգակին և մեզ բարի օրինակ ծառայելով Բաղձալիին հասնելու ճանապարհին՝ յուշելով, որ «անմատչելի Հեռաւորն» «անընդմիջելի Մերձաւոր» է անոնց համար, ովքեր  սրտով մաքուր (Մատթ. Ե 8)  ու հոգով խոնարհ են (Սաղմ. Ծ 19):

Թէև բանսարկուի սին պատրանքներն ու այս աշխարհի հոգսերը յաճախ մեզ կը շեղեն ճշմարտութեան ուղիէն, սակայն չ՚երկնչենք անձուկ դռնով ու նեղ ճանապարհով ընթանալու, դէպի Կեանք տանող արահետն ընտրենք, քանզի Աստուած մարդացաւ իսկ, որ կեանք ունենանք և ունենանք աւելիով (Յովհ. Ժ 10):  Աստուած Մարդու Որդի դարձաւ, որ մեզ Աստուծոյ որդիներ դարձնէ: Այս ուրախութիւնն ոչ ոք մեզմէ չի կրնար խլել (Յովհ. ԺԶ 22):

2016 թուականը  Հայոց Ազգիս համար փորձութիւններով ու դժուարութիւններով յագեցած տարի մը եղաւ, որոնք Մարդասէր Աստուծոյ կարող Զօրութեամբ պատուով յաղթահարեցինք և լիայոյս ենք, որ հաւատի վահանը, յոյսի սաղաւարտն ու սիրոյ սուսերը և ճշմարտութեան ու արդարութեան զրահները մեզ անսայթաք կը հասցնեն խաղաղութեան ու համերաշխութեան ցանկալի նաւահանգիստ և առաւել ջերմեռանդ կը բարձրաձայնենք. «Փա՜ռք Աստծուն՝ բարձունքներու մէջ, և երկրի վրայ խաղաղութիւն և հաճութիւն՝ մարդկանց մէջ» ( Ղուկ. Բ 14):

Այս առիթով մեր սրտագին ու կենարար աւետիսը կը բերենք Գանատահայոց Եկեղեցական Դասին, Թեմական ու Ծխական Խորհուրդներուն, պատուարժան անդամներուն, Տիկնաց Յանձնախումբերուն ու Դպրաց Դասերուն, Աստուածասէր ու ազգանուէր  բարերարներուն, ազգային, բարեգործական, կրթական ու մշակութային միութիւններու, հաստատութիւններու անդամներուն մաղթելով Տիրոջ առատ օրհնութիւններն ու շնորհները անձնական ու հասարակական կեանքի մէջ։

Օրհնեալ ըլլաք Դուք եւ Ձեր ընտանեկան յարկերը յաւէտ լեցուին մանուկ Յիսուսի ծննդեան երանաւէտ աւետիսով։

Շնորհաւոր Նոր Տարի եւ Սուրբ Ծնունդ

Աղօթքով եւ Օրհնութեամբ՝
Աբգար Եպս. Յովակիմեան
Առաջնորդ Գանատահայոց Թեմի