Թորոնթոյի Ս. Երրորդութիւն Հայց. Առաք. Եկեղեցւոյ Հայրերու Օրուայ Տարեկան Դաշտագնացութիւնը տեղի ունեցաւ Կիրակի, 18 Յունիս, 2017-ին, «Milne Dam Conservation Park»-ին մէջ:
Եկեղեցւոյս Հոգեւոր Հովիւ՝ Արժ. Տէր Զարեհ Ա. Քհնյ. Զարգարեան, իր կողքին ունենալով դպիրներ եւ մասնակցութեամբ ներկայ հոծ բազմութեան, ժամերգութիւնը կատարեց եւ օրհնեց հայրերն ու մեծ հայրերը:
Հայկական ճոխ աղանդերները, խորովածը, հրաշալի օդն ու ջերմ մթնոլորտը մեծապէս գոհ ձգեցին ներկայ բազմութիւնը: Փոքրերու եւ չափահասներու համար կազմակերպուած էին զուարճալի խաղեր: Տեղի ունեցաւ նաեւ վիճակահանութիւն:
Տէր Զարեհ Ա. Քահանան օրհնեց ու գնահատեց եկեղեցւոյս Տիկնանց Միութեան անդամուհիները, դաշտահանդէսը կազմակերպող յանձնախումբն ու բոլոր կամաւորները յաջող ու զուարճալի դաշտագնացութեան համար:
Կիրակի, Յունիս 25, 2017-ին, յաւարտ Սբ. Պատարագի, Հոգեւոր Հովիւի եւ Ծխական Խորհուրդի կողմէ գնահատանքի արժանացան երկու անձեր իբրեւ «2017 Տարուայ Հայրեր»: Տէր Զարեհ Ա. Քհնյ. Զարգարեան օրհնեց ու շնորհաւորեց Պարոնայք՝ Սամվել Հարությունյանն եւ Տիգրան Թորոսեանը, գնահատելով անոնց նուիրումը իրենց ընտանիքներուն, ինչպէս նաեւ Սբ. Երրորդութիւն Հայց. Առաք. Եկեղեցւոյն ու Սբ. Սահակ եւ Սբ. Մեսրոպ Շաբաթօրեայ Վարժարանին մատուցած իրենց նուիրեալ ծառայութեանը համար:
