Հայաստանի զարգացման հիմնադրամին աջակցութեամբ՝ ոսկերչական 5 ընկերութիւններ աշնանային «JUNWEX Moscow» միջազգային ցուցահանդէսին 1.2 միլիոն տոլարի արտահանման պատուէրներ ստացած են: Ըստ Armenpress.am-ի՝ այս մասին փոխանցած են Հայաստանի զարգացման հիմնադրամի լրատուական ծառայութենէն։
Հայկական ընկերութիւնները ցուցահանդէսի օրերուն, յատկապէս ռուսական մեծածախ գնորդներու հետ, կնքած են արտահանման 5 պայմանագիր, եւս 16-ը բանակցութիւններու փուլի մէջ են, որոնք էականօրէն պիտի աւելցնեն «JUNWEX Moscow2017»-ին կնքուած արտահանման պայմանագիրներու ընդհանուր ծաւալը: Հայկական թանկարժէք զարդերը ընդունուած են նաեւ ցուցահանդէսի ոչ մասնագիտացած այցելուներուն մէջ, որոնք ձեռք բերած են 34,000 տոլարի թանկարժէք զարդեր:
«Արաբական շուկան նոյնպէս մեզի համար թիրախային է, ուստի նպատակ ունինք միասնական հայկական տաղաւարով մասնակցելու նաեւ Տուպայի «Վինչենցաորօ» ցուցահանդէսին, որուն համար Մոսկուայի մէջ արդէն հանդիպած եւ բանակցած ենք կազմակերպիչներու հետ` մեր արտադրողներուն աւելի լաւ պայմաններ տրամադրելու շուրջ»,- նշած է Հայաստանի զարգացման հիմնադրամի Ձեռնարկներու կազմակերպման խումբի ղեկավար Մարքուս Ազատեանը: ՀԶՀ խումբը նաեւ հանդիպում կազմակերպած է Հայ Ոսկերիչներու ընկերակցութեան (AJA) նախագահ Գագիկ Գէորգեանի հետ, որ պատրաստակամութիւն յայտնած է աջակցելու ոսկերչական հայկական արտադրանքի առաջմղման` միջազգային շուկայի մէջ:
