Թէքէեան Մշակութային Միութեան Տիկնանց յանձնախումբի յաջող տօնավաճառը

Մոնթրէալի հայ գաղութը մի’շտ կենսունակ, մի’շտ իրերայաջորդ ձեռնարկներ կազմակերպելու անխոնջ տրամադրութեան մէջ է եւ կը յաջողի:

Յաջողեցան նաեւ ու պիտի յաջողին բոլոր կազմակերպութիւններու տօնավաճառները ի’նչ փոյթ թէ 19 Նոյեմբերի Կիրակի առաւօտը սկսաւ մտահոգիչ առաջին ձիւնով: Ժողովուրդը նշեալ ժամանակէն առաջ ժամանեց Թէքէեան Մշակութային Միութեան Կեդրոնը, վայելելու համար տօնավաճառի մթնոլորտը:

Ըստ ընկալեալ սովորութեան, բացառիկ ճաշակով յարդարուած էր «Տօքթ. Յարութիւն եւ Սիմա Արզումանեան» սրահը:

Խմբային Տէրունական աղօթքով եւ «Զգործս ձեռաց մերոց» մաղթանքով, օրուան շնորհալի նախագահուհին Տիկին Անի Մանուկեան հատումը կատարեց ժապաւէնին յաջողութեան ջերմ մաղթանքներով:

Տիկին Անին ազնուասիրտ հայուհի մըն է, ազգային գիտակցութեամբ եւ նուիրումով անշահախնդրօրէն ծառայած է Թ. Մ. Մ. ին եւ քաջալերած է գաղութի բոլոր ձեռնարկները իր նպաստը բերելով անոնց յառաջդիմութեան, ժպիտդ անպակաս սիրելի Անի, առաւել պատիւներու արժանի ըլլաս երկար տարիներու ընթացքին.

Սրահին մուտքին հանդիպեցանք զանազան տնային պիտոյքներու. մանկական արժէքաւոր խաղալիքներու (յարմարագոյն գիներով). յատկապէս երախաներու համար պատրաստուած գունագեղ գիրքերու, հայաստանեան գրիչներու եւ հայաստանեան անուշեղէններու արտադրութիւններուն:

Այլազանութեամբ ճոխացած խմորեղէններու եւ անուշեղէններու սեղանը, նուիրուած էր Թ. Մ. Մ. ի առաքելութեան հաւատացող տիկիններուն կողմէ:

Ամիսներ ամբողջ հոյլ մը նուիրեալ տիկիններ, սիրով եւ համբերութեամբ պատրաստեցին համեղ ուտեստեղէնները: Միշտ վայելելով նաեւ Սիլվային պատրաստած համեղ ճաշերը, դալար մնան մեր տիկիններու յոգնած ձեռքերը սակայն ազգին համար իրենց կարելին յատկացնելու պատրաստակամութիւնը:

Տօնավաճառի ամբողջ տեւողութեան սրահը յորդեցաւ այցելուներով. մասնաւորաբար երիտասարդներով, որ մեծապէս նպաստեց անոր յաջողութեան: Ճաշերու սպասարկութիւնը կատարուեցաւ անթերի կերպով:

Թէքէեան Մշակութային Միութեան ժրաջան ատենապետը Պրն. Պերճ Գոգորեան շնորհակալութիւն յայտնեց բոլոր գործունեայ տիկիններուն, մասնաւորաբար դրուատական խօսքերով գնահատեց Տիկին Անի Թորիկեանը որ երկար տարիներէ ի վեր կը կազմակերպէ յաջող տօնավաճառները :

Շնորհաւորեց եւ շնորհակալութիւն յայտնեց Տիկ. Անի Մանուկեանին իր ներկայութեան եւ առատաձեռն նուիրատուութեան համար:

Բախտաւորներ շահեցան վիճակահանութեան առատ նուէրները:

Հաւաքական լուրջ աշխատանքը տուաւ ակնկալուածէն առաւել իր արդիւնքը: Վարձքը կատար բոլորին: Մասնաւորաբար սիրելի Անի Թորիկեան, մնաս մի’շտ աշխոյժ պատնէշի վրայ ծառայութեան ոգիով տոգորուած:

Վ. Պալեան