Քաղաքիս համակրելի ու արժանաւոր օփերայի երգչուհի սոփրանօ Լին Անոյշ Իշնար վերջերս զանազան օփերաներու մէջ հանդէս գալով բացայայտ կերպով այս մարզին մէջ իր կարողութիւնները յայտնաբերեց։ Մարտ ամսուայ մէջ, նախ J. Strauss ի « Die Fledermaus» օփերային մէջ, Ատելի երկրորդ կարեւոր դերը մարմնաւորեց եւ ան իր գեղեցիկ ձայնով ու դերակատարութեամբ մեծ գնահատանքի արժանացաւ։
Ապա Վ.Ա. Մոցարթի Magic Flute օփերային մէջ սիրոյ մասին իրենց զգացումները երգերով արտայայտող զուգերգներէն Papageno – Papagena զուարդախօս եւ կատակերգական դերերէն մին ստանձնելով իր բեմական կարողութիւնները ցոյց տուաւ։
Լին Անոյշ Իշնար ներկայիս իր օփերայի ուսումը կը շարունակէ « Րոյըլ » երաժշտանոցի « Կլէն Կուլտ » վարժարանին մէջ, հետեւելով « Artist Diploma Program » ծրագրին։ Ան երկու տարուայ իր ուսման շրջանը յաջողութեամբ բոլորելով 8 Ապրիլ 2018 Կիրակի օր, երեկոյեան « Րոյըլ » երաժշտանոցի « Mazzoleni » համերգասրահին մէջ երաժշտասէրներու ընտրեալ հոծ բազմութեան եւ նաեւ քննիչի մը ներկայութեան հանդէս եկաւ վերջնական շրջանաւարտութեան մենահամերգով մը։ Իրեն դաշնակով կ՚ ընկերակցէր համալսարանի իր ուսուցչուհին Ճէնիֆըր Թանկ, որ իր դաշնակի զգայուն եւ ճարտար նուագով կարեւոր բաժին մը ունեցաւ համերգին յաջողութեան։
Օր. Իշնարին յայտագիրը ամբողջութեամբ կը բաղկանար ոչ թէ օփերայի արեաներէ, այլ զանազան նշանաւոր յօրինողներու կողմէ գրուած դասական երգերէ, որոնք օփերայի արեաներու համարժէք երգեր էին։ Այս երգերը մեկնաբանեց գերմաներէն, ֆրանսերէն, սպաներէն, պրազիլիոյ պաշտօնական լեզուն փորթուկալերէն եւ անգլերէն լեզուներով։
Յայտագիրը սկսաւ գերման-ամերիկացի յօրինող Kurt Weill ի « Եուքալի » երգով։ Այս երգը կը ներկայացնէր երեւակայական, երազային աշխարհ մը, որ գոյութիւն չունի։
Օր. Իշնար երգերուն սկսելէ առաջ ներկաներուն հակիրճ տեղեկութիւններ կը փոխանցէր երգերու մասին։ Յաջորդաբար իր բիւրեղեայ ձայնով մեկնաբանեց ֆրանսացի ծանօթ յօրինող Maurice Ravel ի « Vocalise en forme de Habanera » կտորը։ Գանատացի յօրինող Lmant Raminsh էն երեք սպանական քնարերգութիւններ ( lyrics )։ Արուեստագիտուհին յայտագրին առաջին մասը աւարտեց մեկնաբանելով Պրազիլիացի նշանաւոր յօրինող Heitor Villa-Lobos էն « Bachianas Brazileiras No: 5 » երկու երգեր, որոնք էին արիայ մը եւ պար մը, այս վերջին կտորին մէջ հեղինակը զանազան տեսակ թռչուններուն կը խօսի, որոնք կը յիշեցնեն իր Cariri ի տունը։ Այս երկու երգերուն թաւջութակով գեղեցկօրէն իրենց մասնակցութիւնը բերին երաժշտանոցի վեց աշակերտներ։ Կարճ միջնարարէ մը ետք, յայտագրին երկրորդ մասը սկսաւ ֆրանսացի յօրինող Georges Bizet ի երեք կտորներով։ Georges Bizet նշանաւոր Քարմէն օփերայի կողքին սպանական երգերու ազդեցութեան տակ մնալով եւ այդ երգերէն ներշնչուելով գրած է շատ մը դասական երգեր։ Օր. Իշնար մեկնաբանեց « Ouvre ton coeur », « Serenade » եւ « Tarantelle » կտորները։
Յայտագիրը շարունակուեցաւ սպանացի յօրինող Fermin Maria Alvarez ի « La Partida » երգով։ Դարձեալ սպանացի յօրինող Fernando Obradors ի երեք կտորները ներկայացուց, մեկնաբանելով « Chiquitita la novia », « Del cabello mas sutil » եւ « El Vito » երգերը։ « El Vito »ն կրակոտ պար մը է, որ կը ներկայացուի գինետան մը մէջ սեղանի վրայ կանգնած կնոջ մը կողմէ ցլամարտիկներու ներկայութեան։
Լին Անոյշ Իշնար որպէս վերջին կտոր հանդէս եկաւ հայերէն երգով մը, մեկնաբանելով Առնօ Պապաճանեանի « Չքնաղ երազ » կտորը, որուն վերամշակումը կատարուած էր Քաջածանօթ դաշնակահար Սերուժ Գրաճեանի կողմէ, այս երգին ջութակով ընկերացաւ նաեւ Felipe M. Garcia։
Ձեռնարկի աւարտին Օր. Իշնար եւ արուեստագետները երաժշտասէրներու յոտնկայս երկարատեւ որոտընդոստ ծափահարութիւններուն արժանանալով գեղեցիկ ծաղկեփունջեր ստացան։ Այնուհետեւ տեղի ունեցաւ պատշած հիւրասիրութիւն, ներկաներ առիթը ունեցան մեր արժանաւոր արուեստագիտուհին շնորհաւորելու եւ իր հետ նկարուելու։
