Շնորհակալութիւն: Մարդկային հոգին եւ տրամադրութիւնները բնականօրէն բարձրացնող զգացողութիւն մըն է, որ կ’արժեւորէ իր կատարած աշխատանքը, ինչպէս նաեւ իր կատարած առաւել կամ նուազ զոհողութիւնները:
Այս լուրջ գիտակցութեամբ, Թէքէեան Մշակութային Միութեան Վարչութիւնը 2017 տարուան ընթացքին իր ներկայացուցած՝ 51 ձեռնարկներու կազմակերպչական գործին ետին աշխատող (թատերական, դասախօսական, Տիկնանց, պազար, միջինք, ընկերայինի ելոյթները, ճատրակ) անհատներ արժանաւորապէս գնահատելու համար, Կիրակի 18 Օգոստոսին կազմակերպոած էր ճաշկերոյթ փիքնիք ի մը: Միասնական աշխատանքով «միատեղ խմբուած բարեկամներ եկած էին վայելելու Թէքէեանի մէջ հաճելի մթնոլորտ մը, խոստմնալից էր հոծ բազմութեան ներկայութիւնը:
Թ. Մ. Միութեան վարչական անդամ եւ նախկին ատենապետ պրն. Արթօ Մանուկեան, օրուան նպատակին մասին խանդավառ բացատրութիւններ տալէ վերջ, հրաւիրեց միութեան նուիրեալ ատենապետ պրն. Պերճ Գոգորեանը, որ իւրայատուկ ջերմութեամբ, մի առ մի յիշելով բոլոր յանձնախումբերը, գնահատեց անոնց աշխատանքն ու զոհողութիւնը:
Շնորհակալութեան օրուան աւանդութեան համաձայն, թատերական յանձնախումբի անդամները գաղտնի քուէարկութեամբ կ’ընտրեն իրենց տարուան դերասանը:
Այս տարի այդ պատիւին արժանացաւ Ռաֆայէլ Խաչատուրեանը եւ ստացաւ փորագրուած պատուոյ գնահատագիրը:
Վարչական որոշումով, Թ.Մ.Մ. ի գործունէութեան մեծագոյն նպաստը բերող տարուան մարդը ծանուցուեցաւ Մոնթրէալի Թէքէեան Մշակութային Միութեան հիմնադիր ծնողքի զաւակ, ճիշդ ժամանակին երիտասարդաց ի գործունեայ անդամ, շրջան մը նուիրեալ ատենապետ հաւատաւոր կուսակցական, այժմ Թ. Մ. Մ. ի գործունէութիւնը նիւթապէս եւ գործնապէս քաջալերող անձնաւորութիւն մը, պրն. Աւետիս Ճիհանեան խորհրդանշական մակագրուած արձանիկով Վարչութիւնը յայտնեց իր երախտագիտութիւնը:
Ներկաները խանդավառ ծափահարութիւններով յայտնեցին իրենց գնահատանքը:
Ջերմ մթնոլորտը շարունակուեցաւ:
Աշխատանքային նոր խոստումներ, քաջալերանքի կրկնակի արտայայտութիւններ ապագայ յաջողութիւններու գրաւականներ եղան Թէքէեան Մշակութային Միութեան համար: Կրկին Շնորհակալութիւն:
Վ. Պալեան
