Գանատահայոց Թեմի Առաջնորդարանէն ստացած ենք թեմիս նորանշանակ Հոգեւոր Հովիւ՝ Արժ. Տ. Դաւիթ Քհն. Մարգարեանի ինքնակենսագրութիւնը:
Ծնած եմ 1977 Ապրիլ 2-ին, Էջմիածին քաղաքին մէջ, ուր ստացած եմ նախնական կրթութիւնս տեղւոյն միջնակարգ դպրոցին մէջ եւ ապա յաճախած եմ Շիրակի Թեմի Հոգեւոր ընծայարանը: 1995-2001 ուսանած եմ Մայր Աթոռ Ս. Էջմիածնի Գէորգեան Հոգեւոր Ճեմարանին մէջ ու ապա տարի մը ծառայած եմ Գերմանիոյ Հայոց Թեմէն ներս: 2002-2005 ստանձնած եմ Ֆրանսայի Վալանս քաղաքի Ս. Սահակ-Ս. Մեսրոպ եկեղեցւոյ երկսեռ երգչախումբի պատասխանատուութիւնը եւ պատրաստած եմ չորս սարկաւագներ: 2005-2016 եղած եմ հովիւի օգնական եւ արարողութեան պատասխանատու Զուիցերիայի Ժընեւ քաղաքի Ս. Յակոբ եկեղեցւոյ մէջ:
2016 Ապրիլին հրաւէրով Ն.Ս.Օ.Տ.Տ. Գարեգին Բ-ի ութնամսեայ խտացուած վերապատրաստման շրջան եմ ունեցած Մայր Աթոռ Ս. Էջմիածնի մէջ։
2016 Հոկտեմբեր 23-ին Գիւտ Խաչի տօնին, ձեռամբ Գերշ. Տ. Յովնան եպս. Տէրտէրեանի, օծուած եմ քահանայ։
2016 Դեկտեմբերէն 2018 Յուլիս 1 ծառայած եմ Ֆրանսայի Շարվիոյ եւ Ռօմանի ծուխերուն: Միաժամանակ այցելու հովիւ ծառայած եմ Մարսէյի Ս. Յակոբ եկեղեցւոյ։
2018 Յուլիսի 10-ին Գանատահայոց Թեմի առաջնորդ Գերշ. Տ. Աբգար Եպս. Հովակիմեանի տնօրինութեամբ նշանակուած եմ Առաջնորդարանիստ Ս. Գրիգոր Լուսաւորիչ Մայր Եկեղեցւոյ հոգեւոր սպասաւոր։
Մկրտութեան Աւազանի անունս է Արմէն։
Ունիմ երեք դուստր։
