Երէկ, Մայիսի 30-ին, Թէքէեան կենտրոնում տեղի ունեցաւ արդէն ամէնամեայ դարձած «Վահան Թէքէեան» մրցանակաբաշխութեան հանդիսաւոր արարողութիւնը: Միջոցառմանը ներկայ էին ԱՄՆ-ի եւ Գանատայի ԹՄՄ կենտրոնական վարչութեան նախագահ Երուանդ Ազատեանը, ՀԹՄՄ նախագահ Ռուբէն Միրզախանեանը, մշակոյթի բազմաթիւ գործիչներ, երիտասարդ արուեստասէրներ, լրագրողներ:
Միջոցառումը բացուեց Հայաստանի ֆիլհարմոնիք նուագախմբի քամերային կազմի գեղեցիկ կատարմամբ:
Նախՙ ողջոյնի խօսքով հանդէս եկաւ Ռուբէն Միրզախանեանը եւ յայտարարեց այս տարուայ մրցանակաբաշխութեան չորս անուանակարգերըՙ գրականութիւն, երաժշտութիւն, կերպարուեստ եւ թատերական արուեստ: Նա իր խօսքում նշեց, որ այս մրցանակաբաշխութիւնն ի բնէ նպատակ է ունեցել խրախուսել մշակոյթի գործիչներին, այդիսկ կերպ զարգացնելով հէնց մշակոյթը.
«Մեր միութիւնը միշտ մշակոյթի կողքին է եղել, եւ ոչինչ չի խնայել յանուն դրա զարգացման, հիմա էլ է այդպէս, ապագայում էլ այդպէս է լինելու», -ասաց նա:
Գրականութիւն անուանակարգում մրցանակի արժանացաւ կինոգէտ, բանասէր, գրող Արծուի Պախչինեանի «Այլաստանցի Մուչիկ հայաստանցին» վէպը:
Խօսելով Պախչինեանի այս վէպի մասին, ժիւրիիՙ գրականութեան յանձնախմբի նախագահ Երուանդ Ազատեանը խիստ կարեւորեց այն:
«Եթէ նոր ժամանակների չափանիշներով դատենք, ապա այս վէպը, միանշանակ, յաւակնում էՙ պէսթսէլլըր լինելու»:
Ա. Պախչինեանի յարգելի բացակայութեան պատճառով մրցանակն ընդունեց նրա կինը, որն ամուսնու անունից շնորհակալութիւն յայտնեց բոլորին եւ յոյս յայտնեց, որ աշխարհի չորս կողմում սփռուած հայութիւնն իր ամուսնու գրքի հերոսիՙ Մուչիկի պէս ի վերջոյ վերադառնալու է տուն եւ տէր է կանգնելու իր հայրենիքին:
«Թատերական արուեստ» անուանակարգում մրցանակի արժանացաւ հայ թատրոնի պատմութեան լաւագոյն մասնագէտ, կարելի է ասել այդ ասպարէզում վերջին մոհիկան Պախտիար Յովակիմեանի «Նոր Ջուղայի թատրոնը. 1887-2017» ուսումնասիրութիւնը:
Անուանակարգի ժիւրիի նախագահ Արմէն Էլպակեանը խիստ դրուատելի երանգներով ընդգծեց Պախտիար Յովակիմեանի աւանդը հայ մշակոյթի եւ յատկապէս հայ թատերարուեստի պատմութեան ուսումնասիրման ոլորտում:
«Մեր մշակոյթի գործիչները կարիք ունեն ո՛չ միայն ֆինանսական աջակցութեան, այլեւՙ վերաբերմունքի, իրենց քրտնաջան աշխատանքի համար: Որովհետեւ այդ ամէնը ներդրում է ապագայի մէջ. այն ինչ հիմա ստեղծւում է, նպատակ ունի մեզանից յետոյ եկողներին հարստացնելու եւ ապահովագրելու, դրան է միտուած նաեւ Պախտիար Յովակիմեանի այս արժէքաւոր աշխատութիւնը: Նա հայ մշակոյթի այն երախտաւորներից է, որին կարելի է անուանել մեր քայլող պատմութիւնը, շատ ուրախ եմ, որ առիթ ունեմ ներկայացնելու նրան»:
Բոլորին ողջունեց եւ շատ կարեւոր խօսքով հանդէս եկաւ նաեւ ինքըՙ Պ. Յովակիմեանը: Նա իր խօսքում շնորհակալական խօսքեր ուղղեց մրցանակաբաշխութեան կազմակերպիչներին, եւ յայտարարեց, որ այս մրցանակի նիւթական մասով ինքը տպագրելու է պարսկահայ թատրոնի մասին իր աշխատութիւնը: «Այսօր թատերագիտութիւնը մեռած է, տեղ չկայ տպագրելու, փառք Աստծոյ, որ «Ազգ»ը տեղ է տալիս մեր մշակոյթին, այլապէսՙ ոչ ոք չի տպում»:
«Կերպարուեստ» անուանակարգում մրցանակի արժանացաւ Արա Յակոբեանը իր «Արեւածաղիկներ» կտաւի համար:
Անուանակարգի յանձնախմբի նախագահ, նկարիչ Կարէն Աղամեանը , ելոյթում արժեւորելով Արա Յակոբեանի դերը հայ կերպարուեստումՙ ասաց.
«Արա Յակոբեանի ստեղծագործութիւնը տրամադրութիւն է ստեղծում, ընկերական-հարազատական միջավայր, նա, վստահ եմ, դեռ իր յստակ խօսքը կասի հայ կերպարուեստի աշխարհում»:
Իր շնորհակալական խօսքում Արա Յակոբեանը, ողջունելով ներկաներին, ասաց, որ իր համար անակնկալ է եղել այս մրցանակը.
«Լուրջ մրցակիցներ ունէի, եւ անկեղծ ասածՙ անակնկալի եկայ, երբ ասացին, որ մրցանակի եմ արժանացել. հաճելի անակնկալ էր»:
Երաժշտութիւն անուանակարգում յաղթող ճանաչուեց Սոֆիա Ազնաուրեանըՙ «Հայաստան» մոնօ-օփերայի համար:
Անուանակարգի յանձնաժողովի նախագահ Յակոբ Աւետիքեանը այն համարեց առանձնայատուկ գործ.
«Այնտեղ խօսքն ու երաժշտութիւնը իրար գտնում են մի շատ հրաշալի համաձուլուածքով, որի արդիւնքում մենք ստանում ենք շատ մաքուր երաժշտական ստեղծագործութիւն, որը հիմնուած է Օսիպ Մանտէլշտամի «Հայաստան» ստեղծագործութեան եւ դրա շրջանակներում տրուած տարբեր վկայութիւնների հիման վրայ: Մի ամբողջ պաշտամունք եմ տեսնում այս ստեղծագործութեան մէջՙ ուղղուած Հայաստանին, սա, իրաւամբ, խօսքի երաժշտականութեան առանձնայատկութիւնն ունեցող, արժէքաւոր գործ է»:
Միջոցառումը եզրափակուեց Սոֆիա Ազնաուրեանի շնոհակալական խօսքով.
«Շնորհակալ եմ բոլորիցդ, ես այս ստեղծագործութեան վրայ մեծ ջանք եմ գործադրել, եւ զգում եմ, որ այն հասել է իր նպատակին»:
Յիշեցնեմ, որ սկսած 1991 թուականիցՙ Հայաստանի Թէքէեան մշակութային միութիւնը մրցանակներ է շնորհում մշակոյթի եւ գիտութեան տարբեր բնագաւառների ներկայացուցիչներին:
Այս տարիների ընթացքում մրցանակի են արժանացել բազմաթիւ բանաստեղծներ, ինչպէսՙ Սիլվա Կապուտիկեանը, Լիւտվիկ Դուրեանը, Հրաչեայ Թամրազեանը, գեղանկարիչներՙ Վարուժան Վարդանեանը, Ռուբէն Աբովեանը, Գէորգ Եղիազարեանը, քանդակագործներՙ Էմիլ Գազազը, Լեւոն Թոքմաճեանը, կոմպոզիտոր Տիգրան Մանսուրեանը, երգահան Ռուբէն Հախուէրտեանը, տիրիժորներ Յովհ. Չէքիճեանը, Կոստանդին Օրպէլեանը, Էդուարդ Թոփչեանը, դերասաններՙ Վարդան Պետրոսեանը, Երուանդ Մանարեանը, լրագրողներՙ Յակոբ Աւետիքեանը, Արթուր Բախտամեանը, գրողներՙ Լեւոն Խեչոյեանը, Սարգիս Վահագնը եւ շատ ուրիշներ:
