«Թեւանիկ» եւ «Վերջին բնակիչը» ֆիլմերու բեմադրիչ Ջիւան Աւետիսեանի՝ Արցախի մասին պատմող նոր ՝«Դրախտի դարպասը» (Gate to Heaven) ֆիլմի անդրանիկ ներկայացումը Երեւանի մէջ տեղի պիտի ունենայ Հոկտեմբերին: Այս մասին կը հաղորդէ PanArmenian.net-ը։
Ֆիլմը ՀՀ, Լիթվիայի, Գերմանիոյ, Պուլկարիայի, Չեխիոյ, Իտալիայի եւ Աւստրիայի համատեղ արտադրութիւն է:
Գլխաւոր դերերու վրայ են Ռիխըրտ Զամմելը, Նինա Կրոնեակերը, Լէոնարտաս Փոպետոնոսցեւասը, Նայիրա Զաքարեանը, Սօս Ջանիբեկեանը, Թաթեանա Սփիվագովան:
Ֆիլմի գործողութիւնը կը կատարուի 2016-ին Արցախի մէջ: Յայտնի գերմանացի լրագրող Ռոպերթը կը վերադառնայ Արցախ՝ լուսաբանելու 23-ամեայ հրադադարէն ետք վերսկսած պատերազմը: Սակայն լրագրողական հետաքննութեան ժամանակ ան կը ծանօթանայ օփերայի երիտասարդ երգչուհի Սոֆիայի հետ, անոնք կը սիրահարուին: Սակայն շուտով Ռոպերթը կը գիտնայ, որ Սոֆիան անյայտ կորսուած լուսանկարիչ-լրագրող Էդգար Մարտիրոսեանի դուստրն է, որ 1992-ին գերի ինկած է Թալիշի գրաւման ժամանակ: Ռոպերթը չէր փորձած փրկել զինք, իսկ մարտի դաշտի վրայ Էդգարի նկարած լուսանկարները ան յետագային ներկայացուցած էր իբրեւ իրը:
Ֆիլմի անդրանիկ ներկայացումը Ստեփանակերտի մէջ եւս նախատեսուած է 2019-ի Հոկտեմբերին, իսկ 2020 Մարտին անիկա առաջին անգամ պիտի ցուցադրուի Լոս Անճելըսի մէջ:
