Թէքէեան Մշակ. Միութեան նախաձեռնութեամբ, ներկայացուեցաւ առցանցային հաղորդում մը՝ անմահ Աշուղ Սայաթ Նովայի մասին, պատրաստուած արուեստագէտ` Սամուէլ Քէօշկէրեանի կողմէ, իր կողքին ունենալով Սիլվա Ամատունին իբրեւ ասմունքող:
Այս գործադրումը կը բաղկանայ 2 մասերէ: Ա. մասը կը ներկայացնէ՝ Սայաթ Նովայի կեանքի ուղին, իսկ Բ. մասը՝ Սայաթ Նովան որպէս հոգեւորական, բանաստեղծ եւ աշուղ:
Թ.Մ.Միութեան վարչութիւնը, իր ջերմագին շնորհաւորութիւնները կը յայտնէ Սամուէլ Քէօշկէրեանի՝ իր բծախնդրօրէն պատրաստած այս հաղորդումին, Սիլվա Ամատունիին՝ իր դիւրահաղորդ ասմունքային ոճին, ինչպէս նաեւ բոլոր աշխատակիցներուն՝ Ցոլինէ Մուղալեանին (հաղորդավար) , Արա Եազըճեանի (ձայնագրութիւն), Կրէկօրի Քէչեանի (համակարգչային ձեւաւորում), որոնք անսակարկ սատարեցին սոյն գործադրումի յաջողութեան:
Արդէն այս առթիւ, ստացանք շնորհագրեր, որոնցմէ մին, ստորեւ, հպարտութեամբ կ’արձանագրենք:
«ԱՊԱԳԱՅ»
Սայաթ -Նովայի նուիրուած ԹՄՄ-ի առցանց յայտագիրը մտաւորական ճշմարիտ խրախճանք մըն էր, որքան նաեւ բանաստեղծական ու երաժշտական: Սամուէլ Քէօշկէրեանի ներկայացումը տպաւորիչ էր եւ ամբողջական, մանաւանդ իր աղբիւրագիտական ծաւալով ու խորութեամբ: Գրեթէ հիմնական աղբիւր դուրս չթողուց համալրելու համար աշուղին գեղարուեստական վաստակը: Արժանի ներկայացում մը՝ հանճարեղ աշուղին:
Սիլվա Ամատունիի ընթերցումները, Սայաթ Նովայի տաղերուն, տպաւորիչ էին մանաւանդ բարբառային անհարթութիւններու ճկուն վերծանումներով: Վաղուց նաեւ գեղահունչ արեւմտահայերէն չէինք լսած մինչեւ Ցոլիկ Մուղալեանի ներածականը:
Ինծի համար իսկական վայելք մըն էր ամբողջական ծրագիրը: Գուցէ հանրութեան համար աւելի բաղձալի պիտի դառնային Թովմաս Պօղոսեանի կամ Վաղարշակ Սահակեանի համոյթներուն աւելի լայն կատարումները:
Անհամբեր կը սպասեմ Բ. մասին, ուր կը յուսամ նաեւ յայտագրին մէջ ընդգրկուած կ’ըլլան Մօրուս Հասրաթեանի կողմէ Սայաթ Նովայի տաղերուն արդի գրական արեւելահայերէնի վերածումները, աւելի ընկալելի դարձնելու բանաստեղծութեան խորքը:
Երուանդ Ազատեան
Տիթրոյթ, Ապրիլ 1, 2021
Ստորեւ կու տանք հաղորդման կայքը՝
