Յայտնի է «Եւրոտեսիլ-2016»-ի հայաստանեան մասնակիցին անունը: Վերջերս Հանրային հեռուստաընկերութեան «մասնագիտութիւնը` լրագրող» ծրագրի ծիրէն ներս յայտնի դարձաւ, որ Եւրոտեսիլ երգի մրցոյթին Հայաստանը պիտի ներկայացնէ Իվեթա Մուկուչեանը:
Ինչպէս «Արմէնփրէս»-ը կը տեղեկացնէ , «Եւրոտեսիլ»-ի այս տարուան պատուիրակի գլխաւոր ցանկութիւնը եւրոպական բեմին վրայ հայկական ջերմութիւնը եւ եւրոպական շունչը համատեղ ներկայացնելն է: «Անչափ ուրախ եմ եւ շնորհակալ Հանրային հեռուստաընկերութեանը, ում կողմից ընտրուել եմ ներկայացնելու իմ հայրենիքն այս տարի «Եւրոտեսիլ»-ին: Իւրաքանչիւրիդ ամէն խօսքն ու կարծիքը ինձ անչափ ոգեւորում եւ ուժ է տալիս: Յուսով եմ` կը լինէք կողքիս այս պատասխանատու եւ կարեւոր ճանապարհին»,- նշած է Իվեթա Մուկուչեանը:
Զուգահեռաբար Հանրային հեռուստաընկերութիւնը կը յայտարարէ երգահաններու մրցոյթ եւ կը սպասէ աշխարհի բոլոր ծայրերէ իւրայատուկ եւ հետաքրքրական աշխատանքներու: Երգերը անհրաժեշտ է մինչեւ Նոյեմբեր 13-ը ուղարկել selection@armtv.com ելեկտրոնային հասցէին:
Իվեթա Մուկուչեանը ծնած է 1986-ին, Հայաստան: Ան 5 տարեկան էր, երբ անոր ընտանիքը տեղափոխուած է Գերմանիա, սակայն 20 տարի այնտեղ ապրելէ ետք, Իվեթան կ՛որոշէ վերադառնալ իր արմատներուն` Հայաստան: Ան յաճախած է Երեւանի Կոմիտասի անուան պետական երաժշտանոցը: Ուսման տարիներուն ալ hասկցած է, որ իր ինքնադրսեւորման հիմնական միջոցը եւ կոչումը երաժշտութիւնը պէտք է ըլլայ: 2012-ին մասնակցած է «Գերմանիոյ ձայնը» նախագիծին: Քրտնաջան աշխատանքի արդիւնքով այսօր Իվեթան արդէն ճանչցուած երգչուհի է, ինչպէս նաեւ շարք մը երգերու հեղինակ, որ զուգահեռաբար գործունէութիւն կը ծաւալէ Հայաստանի եւ Գերմանիոյ մէջ: Իր իսկ բնութագրմումով` «կը մտածէ գերմանացիի պէս, կը սիրէ` հայու»:
Լուսանկարը` Իվեթա Մուկուչեանի ֆէյսպուքեան էջէն
