Ժողովրդավարական բարեփոխումներու օրակարգը կը շարունակէ մնալ Հայաստանի կառավարութեան առաջնահերթութիւններու շարքին, եւ ՀՀ իշխանութիւններուն նուիրուածութիւնը ժողովրդավարական բարեփոխումներու գործընթացին անբեկանելի է: Այս մասին յայտնած է վարչապետ Նիկոլ Փաշինեան` ընդունելով Հարաւային Կովկասի ու Վրաստանի ճգնաժամի հարցերով Եւրոմիութեան յատուկ ներկայացուցիչ Թոյվօ Քլաարը` Հայաստանի մէջ ԵՄ պատուիրակութեան ղեկավար, դեսպան Անտրէա Վիքթորինի ուղեկցութեամբ:
Վարչապետը կարեւորած է Հայաստան-Եւրոպական Միութիւն յարաբերութիւններու շարունակական զարգացումը եւ այդ ուղղութեամբ համատեղ ջանքերը:
Զրուցակիցները քննարկած են ԵՄ-ի կողմէ Հայաստանին համար նախատեսուած 2,6 միլիառ եւրոյի ներդրումային փաթեթի իրականացման ուղղութեամբ աշխատանքներու ընթացքին վերաբերող հարցեր: Այդ ծիրին մէջ, առանձնակի կարեւորուած է Սիւնիքի մարզին մէջ 80 միլիոն եւրոյի փաթեթի արդիւնաւէտ կեանքի կոչումը:
Վարչապետը բարձր գնահատած է Եւրոպական Խորհուրդի նախագահ Շարլ Միշէլի ջանքերը` տարածաշրջանին մէջ փոխըմբռնման ու կայունութեան ամրապնդման ուղղութեամբ:
Հանդիպման ընթացքին անդրադարձ կատարուած է 44-օրեայ պատերազմին հետեւանքով Հարաւային Կովկասի մէջ ստեղծուած իրավիճակին, հայ-ատրպէյճանական սահմանին իրավիճակի լիցքաթափման ու կայունութեան ապահովման ուղղուած քայլերուն: Մասնաւորապէս, միտքեր փոխանակուած են Սոչիի մէջ Ռուսաստանի նախագահին, Պրիւքսէլի մէջ Եւրոպական Խորհուրդի նախագահին ու Ֆրանսայի նախագահին միջնորդութեամբ կայացած հանդիպումներուն, ինչպէս նաեւ Փետրուար 4-ի քառակողմ տեսաժողովին արդիւնքներուն ու ձեռք բերուած պայմանաւորուածութիւններուն իրականացման վերաբերեալ:
Կարեւորուած է Լեռնային Ղարաբաղի հակամարտութեան գօտի ԵՈՒՆԵՍՔՕ-ի առաքելութեան ու միջազգային մարդասիրական կազմակերպութիւններու մուտքի ապահովումը` հաշուի առնելով հայկական մշակութային ժառանգութեան նկատմամբ ատրպէյճանական կողմէ հնչեցուող սպառնալից յայտարարութիւններն ու արդէն իսկ հայկական շարք մը կոթողներու ոչնչացման ուղղութեամբ իրականացուած քայլերը:
Ընդգծուած է նաեւ Լեռնային Ղարաբաղի հակամարտութեան տեւական կարգաւորման ուղղութեամբ ԵԱՀԿ Մինսքի խմբակի համանախագահութեան հովանիին ներքոյ խաղաղ գործընթացի լիարժէք գործարկման եւ համանախագահներու գործունէութեան աշխուժացման անհրաժեշտութիւնը:
