Դիլիջանի մէջ Ուրբաթ՝ 30 Հոկտեմբեր 2015-ին, տեղի ունեցաւ քաղաքի նոր եկեղեցւոյ հողօրհնութեան արարողութիւնը եւ յայտարարուեցաւ եկեղեցւոյ կառուցման ծրագրի մեկնարկը, կը հաղորդէ «մետիամաքս»-ը:
Եկեղեցին կը կառուցուի Մայր Աթոռ Սուրբ Էջմիածինի, Դիլիջանի քաղաքապետարանի, «Հայաստանի զարգացման նախաձեռնութիւններ» (IDeA) հիմնադրամի ու «Դիլիջանի զարգացման հիմնադրամ»-ի համատեղ ջանքերով:
Ծրագրի նուիրատուներն են՝ բարերարներ Ռուբէն Վարդանեան, Գագիկ Ադիբեկեան, ինչպէս նաեւ Մաքսիմ Աթայանց ու Արմէն Կարապետեան:
Հողօրհնութեան հանդիսաւոր արարողութեան ներկայ եղած են Ամենայն հայոց Գարեգին Բ. կաթողիկոս, IDeA հիմնադրամի համահիմնադիր Ռուբէն Վարդանեան, IDeA-ի եւ «Դիլիջանի զարգացման հիմնադրամ»-ի ղեկավարներ Էդգար Մանուկեան ու Արթուր Յակոբեան, մարզային եւ քաղաքային իշխանութիւններու ղեկավարներ, բազմաթիւ հիւրեր եւ դիլիջանցիներ:
Հողի օրհնութեան արարողութիւնը կատարուած է Ամենայն Հայոց Գարեգին Բ. կաթողիկոսի ձեռամբ:
Նոր եկեղեցին պիտի կառուցուի Աղստեւ գետի աջ ափին` Երկրորդ Համաշխարհային պատերազմին զոհուածներու յիշատակը յաւերժացնող յուշահամալիրին յարող տարածքին մէջ:
Եկեղեցւոյ նախագիծին հեղինակը փեթերզպուրկցի ճարտարապետ Մաքսիմ Աթայանցն է:
«IDeA հիմնադրամը Դիլիջանում զարգացման տարբեր ծրագրեր է իրականացնում, որոնցից մէկն էլ քաղաքում եկեղեցու կառուցման ծրագիրն է: Ճարտարապետ Մաքսիմ Աթայանցը հետաքրքիր ճարտարապետական լուծումներով նախագիծ է առաջարկել: Վստահ ենք, որ եկեղեցին իսկապէս հոգեւոր կենտրոն կը դառնայ քաղաքի բնակիչների համար»,- ըսած է IDeA հիմնադրամի ղեկավար Էդգար Մանուկեան:
Եկեղեցին պիտի ըլլայ կեդրոնագմբէթ` երկու զանգակատունով, վերջիններս պիտի տեղադրուին գմբէթի երկու կողմերուն` երկթէք տանիքներու վրայ: Եկեղեցին տեղադրուած պիտի ըլլայ 4,5 մ բարձրութեամբ պատուանդանի վրայ, որուն մէջ պիտի գործեն հասարակական օգտագործման տարածքներ` կամարակապ սրահի մէջէն բացուելով դէպի գետափնեայ փողոցը: Եկեղեցւոյ ընդհանուր մակերեսը կը կազմէ 550 քմ.:
Ներկայիս կ՛ընթանան նախագծային-նախահաշուային աշխատանքները: Շինարարական աշխատանքներուն մեկնարկը կը նախատեսուի 2016-ի Ապրիլէն:
