Բանակի օրուան առթիւ, ծառայողական պարտականութիւնները կատարելու ընթացքին ցուցաբերած նուիրումի եւ խիզախութեան, մատուցած նշանակալի ծառայութիւններուն համար խումբ մը զինծառայողներ պարգեւատրուած են պետական պարգեւներով, արժանացած զինուորական բարձր կոչումներու:
ՀՀ Նախագահի նստավայրին մէջ Չորեքշաբթի՝ 27 Յունուար 2016-ին, կայացաւ պարգեւատրման հանդիսաւոր արարողութիւնը: ՀՀ Նախագահ, զինուած ուժերու գերագոյն գլխաւոր հրամանատար Սերժ Սարգսեան շնորհաւորական ուղերձ յղած է Բանակի օրուան առթիւ, նաեւ շնորհաւորած է պարգեւատրուածները` հայրենիքի բարձր պարգեւներուն ու կոչումներուն արժանանալու առիթով: Այս մասին կը յայտնեն ՀՀ նախագահի մամուլի գրասենեակէն:
***
Նախագահ Սերժ Սարգսեանի շնորհաւորական ուղերձը Բանակի օրուան առթիւ
Սիրելի՛ հայրենակիցներ,
Ջերմօրէն շնորհաւորում եմ ձեզ Բանակի օրուայ կապակցութեամբ:
Այս տարի մենք նշելու ենք Հայաստանի Հանրապետութեան անկախութեան հռչակման 25-րդ տարեդարձը: Արդէն քառորդ դար է, ինչ մենք ազատ ու անկախ պետականութիւն ունենք: Այս ողջ ժամանակահատուածում ոչ մի րոպէ չենք կասկածել, որ մեր երկրի 25-ամեայ ուղին անհնարին էր լինելու առանց այն բանակի, որ մենք ենք ստեղծել:
Հայաստանի զինուած ուժերը դարձան այն առաջին քարերը, որ դրուեցին մեր պետականաշինութեան հիմքում: Դա ժամանակի եւ տարածաշրջանի պարտադրանքն էր: Մենք շատ լաւ գիտէինք, թէ ով ենք մենք եւ որտեղ ենք ապրում: Մենք հայ ենք եւ, լինելով Մերձաւոր Արեւելքի եւ Առաջաւոր Ասիայի հնագոյն ազգերից մէկը, ունենք հազարամեակների փորձառութիւն:
Այն ողբերգական իրադարձութիւնները, որ տեղի են ունենում այսօր Մերձաւոր Արեւելքում եւ ընդհանուր առմամբ մեզ շատ մօտ տարածքներում, ցաւալիօրէն ծանօթ են մեզ եւ կրկնուել են պարբերաբար: Մենք եղել ենք ականատեսը, ժամանակակիցն ու տարեգիրը նման իրադարձութիւնների: Մեր աչքի առջեւ են դրանք կատարուել վերջին դարերի եւ առնուազն երկու հազարամեակների ընթացքում: 25 տարի առաջ, երբ մենք ստանձնում էինք սեփական ճակատագիրը տնօրինելու պատասխանատուութիւնը, գիտակցում էինք, որ դա գրեթէ հաւասարազօր է մարտադաշտ մտնելուն:
Եւ մենք մտանք: Մտանք յանուն մարդու եւ ժողովրդի իրաւունքների, յանուն ազատութեան: Մենք արդէն տեսել էինք Պաքուի հայկական եկեղեցուց բարձրացող ծուխը, որ վերջին եւ ամենահամոզիչ ազդանշանն էր բոլոր կասկածողների համար: Աւելի ուշ` արդէն մեր օրերում հրկիզուած ու պայթեցուած կրօնական օջախներից բարձրացող ծուխը պիտի տեսնէր ողջ աշխարհը եւ զարմանքի ու վրդովմունքի սարսուռ ապրէր:
Մենք այդ սարսուռն ապրել ենք 1988-ից սկսած, եւ ինքնաբուխ կերպով ձեւաւորուած ինքնապաշտպանական ջոկատները առաջին քայլերն էին գոյապայքարի ճանապարհին: Մենք նաեւ գիտէինք, որ ֆիդայական շարժումը դատապարտուած է ձախողման, եթէ ժամանակին` հէնց մարտի դաշտում, չվերաճի կանոնաւոր բանակի: Հայոց կանոնաւոր բանակը` մեր յաղթական բանակը, բռնեց պատերազմի քննութիւնը, որովհետեւ այդ օրերին եւ՛ Արցախը, եւ՛ Հայաստանը, եւ՛ ողջ հայութիւնը դարձան մէկ միասնական ազգ-բանակ, դարձան այն, ինչ մեր պատմիչն անուանում է «ասքանազեան ազգ», իսկ Սուրբ գիրքը` «ասքանազեան գունդ», որ իրենից ներկայացնում է եւ՛ երկիր, եւ՛ ժողովուրդ, եւ՛ զինուած ուժ:
Հայոց բանակի սիրելի՛ զինուորներ ու սպաներ, յարգելի՛ վեթերաններ,
Այս փառապանծ տօնը, ի հարկէ, համապետական է եւ համաժողովրդական, բայց առաջին հերթին ձեր տօնն է: Մենք վստահում ենք ձեր նուիրուածութեանը, ձեր մասնագիտական կարողութիւններին, ձեր բարձր մարտական ոգուն: Մաղթում ենք, որ այսուհետ սահմանի վրայ չզոհուի ոչ մի զինուոր: Ձեզ եւ մեր ողջ ժողովրդին մաղթում եմ խաղաղութիւն յանուն մեր երկրի ազատութեան, յանուն արդար աշխատանքի, որ պայմանն է ամէն մի առաջընթացի:
Յարգելի՛ պարգեւատրուածներ,
Շնորհաւորում եմ ձեզ Բանակի օրուայ եւ հայրենիքի բարձր պարգեւներին ու կոչումներին արժանանալու կապակցութեամբ:
Ձեր եւ ձեր ծառայակիցների շնորհիւ է, որ Հայաստանի զինուած ուժերը իրականացնում են իրենց առաքելութիւնը, լուծում իրենց առջեւ դրուած խնդիրները: Դուք դա իրականացնում էք պատուով ու մասնագիտական բարձր մակարդակով:
Դուք արժանաւոր յետնորդներն էք նրանց, ովքեր Արցախեան հերոսամարտի կրակների մէջ հիմքերն էին դնում մեր ապագայ բանակի: Նրանցից շատերն ընկան` մեզ պարգեւելով կեանք ու ազատութիւն: Այսօր` այս նուիրական օրը, մենք գլուխ ենք խոնարհում նրանց պայծառ յիշատակի առջեւ: Դուք այն արժանաւորներն էք, ովքեր հաւատարիմ են նահատակների պատգամներին եւ նրանց կտակած արժէքներին:
Աստուած պահապան Հայոց հողին:
Փառք հայ ժողովրդին եւ նրա ռազմիկ զաւակներին:
