Պելճիքայի արտաքին գործոց նախարար Տիտիէ Ռէյնտըր ֆրանսահայ նշանաւոր երգիչ Շառլ Ազնաւուրին պիտի շնորհէ Թագի շքանշանի ասպետի կոչում (Commandeur de l’Ordre de la Couronne):
Ըստ «Արցախփրես»-ի՝ cinetelerevue.be կայքը կը փոխանցէ` 91-ամեայ երգիչը Նոյեմբեր 17-ին Պրիւքսէլի Forest National սրահին մէջ հանդէս պիտի գայ համերգով: Մրցանակը Ազնաւուրին պիտի յանձնուի համերգի նախօրէին:
Թագի շքանշանը Պելճիքայի արքայական պետական պարգեւն է: Ան ստեղծուած է 1897 թուականին:
Նշանաւոր ֆրանսահայ շանսոնյէ, երգիչ, երգահան, դերասան եւ հասարակական գործիչ Շառլ Ազնաւուր ծնած է 1924 թուականի Մայիս 22-ին, Փարիզ: Բազմաթիւ յայտնի գործերու հեղինակ եւ կատարող է: Վաճառուած է Ազնաւուրի ստեղծագործութիւնները ամփոփող շուրջ 100 միլիոն ձայնապնակ: 2009 թուականէն Ազնաւուրը Զուիցերիոյ մէջ Հայաստանի դեսպան է, ինչպէս նաեւ Ժնեւի ՄԱԿ-ի գրասենեակի եւ այլ միջազգային կազմակերպութիւններու մէջ Հայաստանի մշտական ներկայացուցիչը:
