1898-ին երբ Ամենայն Հայոց Կաթողիկոս Մկրտիչ Խրիմեան Հայրիկ ստեղծեց Ամերիկայի Թեմը, այդ կ’ընդգրկէր Ամերիկայի բոլոր շրջանները՝ Ատլանտեանէն մինչեւ Խաղաղական ովկիանոս: Ժամանակի ընթացքին, այս ափերը հասած նոր գաղթականներու պատճառով ծնունդ առին նոր թեմեր:
Այսպէս՝ 1927-ին Ամերիկայի Արեւմտեան շրջանը դարձաւ առանձին թեմ եւ 1984-ին Գանատան դարձաւ առանձին թեմ:
Յիշենք, որ այս տարի 125-ամեակն է Ամերիկայի Արեւմտեան թեմի:
Վերջերս Ամերիկայի Արեւմտեան շրջանի առաջնորդ Յովնան Արքեպիսկոպոս Տէրտէրեան ընդունեց իր եղբայրներուն՝ ի Քրիստոս Գանատայի Հայոց թեմի առաջնորդ՝ Գերաշնորհ Տէր Աբգար եպիսկոպոս Յովակիմեանին եւ Հիւսիսային Ամերիկայի Հայոց Արեւելեան թեմի առաջնորդ Հոգեշնորհ Տ. Մեսրոպ Պարսամեանին:
Հիւսիսային Ամերիկայի Հայ Եկեղեցւոյ Արեւելեան թեմի առաջնորդ ընտրուելէն ի վեր առաջին անգամ ըլլալով, Հոգեշնորհ Տ. Մեսրոպ Պարսամեանը Սուրբ Լեւոն (Սրբոց Ղևոնդեանց) հայոց մայր տաճարի մէջ պատարագիչն էր Կիրակի՝ 6 Օգոստոս 2023-ին։ Առաջնորդ Տ. Մեսրոպին ներկայացուց թեմի առաջնորդ Յովնան արքեպիսկոպոս Տէրտէրեանը։ Պատարագին կը մասնակցէր նաեւ Գանատայի Հայոց թեմի առաջնորդ՝ Գերաշնորհ Տէր Աբգար եպիսկոպոս Յովակիմեանը։
