Վանքուվըրի ԹՄՄ-ի Մասնաճիւղի վարչական կազմը եւ անդամակցութիւնը այս վերջին ամիսներու ընթացքին ունեցաւ երկու հետաքրքրական հանդիպումներ: Առաջինը՝ ընդհանուր անդամական շինիչ հաւաքոյթ մըն էր, որ տեղի ունեցաւ Հոկտեմբեր 25-ին, Գազպա Ճաշարանին մէջ: Ներկայ էին մասնաճիւղի բոլոր անդամները եւ հիւրաբար մեր մէջ գտնուող Մոնթրէալի Թէքէեան Մշակ. Միութեան երկարամեայ անձնուէր աշխատող անդամ՝ տիկին Անի Մանուկեանը եւ իր դուստրը՝ Լորի Մանուկեանը: Հանդիպումի բացման խօսքը կատարեց պրն. Ճէմիլ Գեւրանեանը, որ ապա հրաւիրեց վերակազմուած Միութեան ատենապետուհի տիկին Ռոզի Թոքաթլեանը: Ան նախ շնորհակալութիւն յայտնեց տիկին Պէաթրիս Արքէլէթեանին, որ սիրայոժար կերպով իր տունը կը տրամադրէ մեր ժողովներուն համար: Ան նաեւ գնահատանք յայտնեց ներկաներուն ու մասնաւորաբար նոր անդամներուն, շեշտելով կարեւորութիւնը հաւաքական աշխատանքի: Տիկին Մէլինէ Գալբաքեան Անգլերէն լեզուով կարդաց Վահան Թէքէեանի հակիրճ կենսագրութիւնը: Խանդավառութիւնը շարունակուեցաւ հայկական խմբային երգերով: Աւարտին, ներկաները շնորհակալութիւն յայտնեցին վարչական կազմին, յուսալով թէ աւելի յաճախականութեամբ կազմակերպուին նման հաւաքոյթները:
Երկրորդ հաւաքը տեղի ունեցաւ 10 Դեկտեմբեր 2016-ին: Այդ օրը Վանգուվըրի Թեքէեանցիներուն համար անմոռանալի օր մը հանդիսացաւ, որովհետեւ հակառակ աննպաստ օդին, քաղաքս ի պաշտօնէ այցելող ԹՄՄ Միացեալ Նահանգներու եւ Գանատայի Վարիչ Քարտուղար Պարոն Արամ Արքուն պիտի հանդիպէր մասնաճիւղի անդամներուն հետ: Նախ քան անդամներու հետ հանդիպումը, Պրն. Արքուն փոքր խումբով վարչականներու հետ խորհրդակցութեան համար հիւրասիրուեցաւ ատենապետուհի տիկին Րոզի Թոքաթլեանի տան մէջ, որմէ ետք բոլոր անդամները հաւաքուեցան Գազպա ճաշարանը: Ամանօրեայ խանդավառութիւնը սկսած էր յատուկ նուէրներու եւ յիշատակներու բաշխումով: Օրուան թամադայ պրն. Ճէմիլ Քեւրանեան բարեգալուստի խօսքերով բացումը կատարեց հաւաքին եւ խօսքը փոխանցեց պատուոյ հիւրին: Պրն. Արքուն շնորհակալութիւն յայտնեց հիւրասիրութեան համար եւ քաջալերական արտայայտութիւններով մաղթեց որ շարունակուի գործունէութիւնը խանդավառութեամբ: Տեղի ունեցան հարցումներ որոնց յարգելի հիւրը տուաւ գոհացուցիչ պատասխաններ: Տիկին Ալիս Արմէնի կողմէ խոր ապրումով կարդացուած Վահան Թէքէեանի «Եկեղեցին Հայկական»ը ամբողջացուց թէքէեանական մթնոլորտի հարազատութիւնը: Տօնական օրերու նուէրներու բաշխումէն ետք ատենապետուհիին առաջարկով, մնացեալ նուէրները վաճառուեցան աճուրդով պրն. Կապի Քէօրհաճեանի խանդավառ հետեւողականութեամբ, գոյացնելով կոկիկ գումար մը նորակազմ ակումբին ի նպաստ: Ներկայ մը:
