Կիրակի՝ 22 Սեպտեմբեր 2019, Գանատահայոց Թեմի բարեխնամ Առաջնորդ Գերշ. Տէր Աբգար եպս. Յովակիմեանը նախագահեց Օթթաուայի Սուրբ Մեսրոպ Հայց. Առաք. եկեղեցւոյ՝ նոր եկեղեցի և համայնքային կեդրոնի դրօշի բարձրացման արարողութիւնը:
Գանատայի մօտ Հայաստանի Հանրապետութեան արտակարգ եւ լիազօր դեսպան՝ Ազնուազարմ Տիկին Անահիտ Յարութիւնեանը, Գանատայի մօտ Հայաստանի Հանրապետութեան Հիւպատսոս՝ Պարոն Արա Մկրտչեանը, Ծխական Խորհուրդի անդամները, գլխաւոր բարերարներ՝ Մեծարգոյ Տէր եւ Տիկին Կարօ եւ Անի Տօնոյեանները ու Ազնուափայլ Տիկին Էլիզապեթ Աճելեանը և Օթթաուայի Հայ համայնքի բազմաթիւ ներկայացուցիչները հաւաքուեր էին նշելու Մայրաքաղաքի, Հայ համայնքի կեանքին մէջ այս կարեւոր հանգրուանը:
Ըստ Հայ եկեղեցւոյ սուրբ աւանդութիւններուն՝ Գերշ. Սրբազան Հայրը օրհնեց հացը, ջուրը եւ աղը:
Այս երեք հիմնական տարրերը մարդու կեանքի մէջ անհրաժեշտ ու կենսական նշանակութիւն ունին: Հացը, ջուրը և աղը Աստուծոյ անսահման բարութեան և խնամքի խորհրդանիշներն են: Այս վսեմ շնորհներնու օրհնութեամբ՝ կը փոխանցուի Արարիչը ծառայելու անմահական հոգեւոր լիցք:
Ազնուազարմ դեսպան Յարութիւնեանը ողջունեց Օթթաուայի Հայ համայնքի մէջ այս նշանակալի զարգացումը և կարեւորեց՝ որպէս համայնք, հաւաքուելու և հայ մշակոյթը, լեզուն և ինքնութիւնը զարգացնելու վայր մը ունենալու հարկաւորութիւնը:
Կեդրոնին նուիրուած գանատական ու հայկական դրօշները՝ Գերշ. Տէր Աբգար եպս. Յովակիմեանի եւ Ազնուազարմ դեսպան Տիկին Անահիտ Յարութիւնեանի կողմէն էին: Համայնքի անունով, Ծխական Խորհուրդի ատենապետ Պարոն Յակոբ Տոքմաճեանը դրօշները ստացաւ ու դէպի կայմերու գագաթը բարձրացուց:
Ծուխի Գանձապահ Պարոն Ժան-Ֆիլիփ Թաշճեանը մանրամասն ներկայացուց Օթթաուայի Սուրբ Մեսրոպ Հայց. Առաք. եկեղեցւոյ վերջին 40 տարուայ տքնաջան աշխատանքներուն մասին, որոնք կատարուեցան ի նպաստ եկեղեցիի ու համայնքային կեդրոնի մը սեփական տարածք ունենալու, ու վերջապէս արժանացան դափնու պսակին ու Օթթաուայի 5065 Thunder Road հասցէով կալուածը եղաւ Աստուածահաճոյ գործունէութեան արգասիքը:
Օթթաուայի Արարատ հայկական դպրոցի աշակերտները, հայկական երաժշտական հարուստ երգացանկէն, հիանալի երեք կատարումներ ներկայացուցին, ապա տեղի ունեցաւ Ծխական Խորհուրդի կողմէն կազմակերպուած բացօթեայ խնճոյք մը:
Մօտ ապագային, Ծխական Խորհուրդը պիտի սկսի շէնքի վերանորոգման աշխատանքները, որպէսզի այն համապատասխանէ համայնքի կարիքներուն:
14 Յունիս 2019-ին, Օթթաուայի Սուրբ Մեսրոպ Հայց. Առաք. Եկեղեցւոյ Ծխական Խորհուրդի փակ յայտի միջոցով, Օթթաուայի քաղաքապետարանի կողմէն ընդունուեցաւ՝ 5065 Thunder Road հասցէով, 6 ակր տարածութեամբ հողի եւ նախկին Carlsbad Springs հասարակական կեդրոնի գնման առաջարկը:
11 Յուլիս 2019-ին, Օթթաուայի քաղաքապետարանը հաստատեց կալուածի վաճառքը:
18 Օգոստոս 2019-ին, յաւարտ Ս. Աստուածածնայ Վերափոխման տօնի առիթով մատուցուած Սուրբ եւ անմահ Պատարագին, Օթթաուայի Սուրբ Մեսրոպ Հայց. Առաք. եկեղեցւոյ արտակարգ Անդամական Ժողովի արդիւնքով, հաստատուեցաւ Օթթաուայի մէջ 5065 Thunder Road հասցէով կալուածը գնելու մասին որոշումը:
29 Օգոստոս 2019-ին, Օթթաուայի Սուրբ Մեսրոպ Հայց. Առաք. եկեղեցին կալուածը պաշտօնապէս գնեց:
