Հինգշաբաթի` 11 Ապրիլ 2024-ի երեկոյեան Պոլսահայ Միութեան «Արամ Խաչատուրեան» Սրահին մէջ հաճոյքը ունեցանք մասնակից դառնալու պոլսահայ բանասէր, ուսուցիչ, թարգմանիչ, քաղաքական ու հասարակական գործիչ Սեւան Տէիրմենճեանի հետ իր վերջին հրատարակած «Կապոյտ Երազ- ծովաբիւր ընտրանի սթամպուլահայ պատմուածքի» ի հատորին երկրորդ տպագրութեան շնորհահանդէսին:
Սոյն գրական երեկոն տեղի ունեցաւ կազմակերպութեամբ Համազգայինի Քէպէքի «Սանահին» մասնաճիւղի գրական եւ Պոլսահայ Միութեան «ՄԷԿ» Մշակութային յանձնախումբերու, ինչպէս նաեւ ներկայութեամբ մշակութային միութիւններու, հայկական մամուլի խմբագիրներու, աշխատակիցներու, եւ ընթերցասէրներու:
Պոլսահայ Միութեան ՄԷԿ մշակութային յանձնախումբի ատենապետ՝ Թալին Գալուսեանի եւ Համազգայինի Քէպէքի «Սանահին» մասնաճիւղի գրական յանձնախումբի ատենապետ՝ Նանոր Սնապեանի բարի գալուստի խօսքերէն ետք, Համազգայինի Գանատայի Շրջանի «Լեւոն Շանթ» հայերէնագիտական դասընթացքի ղեկավար Վիգէն Թիւֆէնքճեան հակիրճ ձեւով ներկայացուց օրուայ հիւրի կենսագրականը:
ՄԷԿ Մշակութային յանձնախումբի անդամ Շանթալ Մանուկեանին եւ հեղինակին մտերմիկ երկխօսութեամբ ներկայացուեցաւ գիրքի բովանդակութիւնը:
Ուրեմն, ահաւասիկ՝ «Կապոյտ Երազ» վերնագրումին շարժառիթը.-
Չորս բաժինները՝ Ծովը, Նաւամատոյցը, Նաւը ու Կղզին (մասնաւորաբար Գնալը կղզիի հայահոծ միջավայրը) մի’շտ մաս կազմած են Պոլսոյ առօրեայ կեանքին եւ հետեւաբար անոնք կ’արտացոլեն անցեալի կամ ներկայ գրագէտներուն զգացումները:
Խմբագիրը յայտնեց թէ «Կապոյտ Երազ»ը պատմուածքներու ժողովածու մըն է Պոլսահայ մամուլէն կամ հրատարակուած գիրքերէն քաղուած:
Յաջորդաբար հատուածներու ընթերցումներ կատարեցին՝ Լարա Քօլլօքեան, Թամար Փանոսեան եւ Սեւակ Աֆարեան, իսկ խմբագիրը հակիրճ կերպով անդրադարձաւ այդ գրութիւններուն ու հեղինակներուն մասին՝ նկարներով ու քարտէզներով:
Աւարտին առիթ տրուեցաւ ներկաներուն, մօտենալու խմբագիրին ու առաւել հետաքրքրական տեղեկութիւններ ստանալու սոյն գիրքին մասին:
Տեղի ունեցաւ պատուասիրութիւն եւ գիրքի մակագրում:
Շնորհաւորելի է Պոլսահայ ՄԷԿ Մշակութային եւ Համազգայինի Քէպէքի «Սանահին» Մշակութային միութիւններու միացեալ աշխատանքը, ունենալով նման բծախնդրութեամբ նախապատրաստած ու գեղեցկօրէն ներկայացուած գրական երեկոյ մը: Նոյնքան շնորհաւորելի են բոլոր պատասխանատուները, որոնք օժանդակեցին երեկոյթի յաջողութեան, նաեւ պրն. Վիգէն Թիւֆէնգճեանը, որուն հրաւէրով պրն. Տէիրմենճեան ժամանած էր Մոնթրէալ:
Հ. Տ.Գ.
Յ. Գ. Սիրելի եւ յարգելի՝ բանասէր ուսուցիչ, խմբագիր, թարգմանիչ քաղաքական ու հասարակական գործիչ Սեւան Տէիրմենճեանի ներկայութիւնը՝ Մոնթրէալ, մեզի՝ «ապագացիներս» գողտրիկ ու հին յիշատակներ արթնցուց: Իր նախկին այցելութիւնը վայելեցինք 2020-ի Յունուար ամսուն, երբ կրկին ըմբոշխնեցինք իր տեղեկատուական բանախօսութիւնները, մանաւանդ մեր անմոռանալի հանդիպումն ու հարցազրոյցը «Ապագայ» շաբաթաթերթին հետ: (Տես «Ապագայ» շաբաթաթերթ 3 Փետր. 2020 ի թիւով եւ յետոյ արտատպուած Գահիրէի՝ «Արեւ» թերթի 6 Փետր. 2020-ի թիւով):
Նորանոր ստեղծագործութիւններու ու յաջողութիւններու ջերմագին մաղթանքներով՝
«Ապագայ»
