Խոր գոհունակութեամբ տեղեկացանք թէ գաղութիս սիրուած ու յարգուած երէց անձնաւորութիւններէն Տոքթ. Արթօ Տէմիրճեան վերջերս պարգեւատրուեցաւ Քէպէքի Ատամնաբուժներու Ընկերակցութեան 2015 տարուան Պատուոյ Մրցանակով (Prix Hommage): Հաստատուած 2007 թուականին, այս պարգեւին կ’արժանանայ Ընկերակցութեան այն անդամը, որ իր բացառիկ վաստակով զարգացուցած է ատամնաբուժութիւնը: Տոքթ. Տէմիրճեան հեղինակն է ատամնաբուժութեան ծիրէն ներս բազմաթիւ հետազօտութիւններու եւ հրատարակութիւններու, ու եղած է Մոնթրէալի Համալսարանի Ատամնաբուժութեան բաժնին երկարամեայ դասախօս: Այս մասին կարդալ մեր այս թիւի ֆրանսերէն բաժնին մէջ ներկայացուած մանրամասնութիւնները:
