Մոնթրէալի՝ Թէքէեան Մշակութային Միութեան սրահին մէջ Black & White ի պարահանդէսը նորութիւն մըն էր:
Բծախնդրօրէն պատրաստուած Ընկերային Յանձնախումբին կողմէ, հայ հասարակութիւնը, մանաւանդ երիտասարդները, կը վայելէին ջերմ պարահանդէս մը առաջնորդութեամբ՝ խանդավառ D.J. GHEVONT ի: Այլազան երաժշտական պարերգներու հնչումներուն տակ, պարահարթակը միշտ լեցուն էր: Ամէն ինչ սեւ-ճերմակ երանգներով կը ներկայացնէր պահանջուած մթնոլորտը: Սրահին յարդարումէն մինչեւ ներկաներուն հագուած գոյները (սեւ-ճերմակ) զուարթ ու գեղեցիկ միջավայր մը կ’ստեղծէին:
Եւ ահա հասաւ անակնկալ ելոյթի մը պահը:
Արհեստավարժ զոյգ մը՝ առաջնորդութեամբ Gerard Derminasyan-ի եւ ընկերակցութեամբ Caroline Zafit-ի ներկայացուցին« Argantinian Tango»-ի պարի ցուցադրութիւն մը, խլելով ներկաներուն խելայեղ ծափերը:
2018-ը յիշատակելի թուական մը պիտի մնայ երիտասարդներուն մտքին մէջ, եւ փափաքելի է, որ նմանօրինակ երեկոյթներ աւելի կրկնուին, բարձրացնելու համար մեր հասարակութեան տրամադրութիւնը:
Գնահատելի էր օրուան յայտագիրը վարող աշխոյժ երիտասարդներուն Մեղրիկ Գանձանակեանի եւ Ճօնի Գարամանլեանի ելոյթը եւ մանաւանդ Թէքէեան Մշակութային Միութեան Ընկերային Յանձնախումբի խանդավառութիւնը սրահէն ներս:
ՆԵՐԿԱՅ ՄԸ
