Փարիզի պատկերասրահներէն մէկուն մէջ ցուցադրուած են յայտնի լուսանկարիչ Արա Կիւլերի աշխատանքները, կը յայտնէ Sputnik ՝ վկայակոչելով Figaro թերթը։ Վերջինս կը նշէ, որ Կիւլերը Թուրքիոյ լուսանկարչական արուեստի առասպէլն է:
Ան ծնած է 1928-ին: Լուսանկարչական արուեստով սկսած է զբաղելու 1950-ականներու սկիզբը: Հօր իրական ազգանունը Տէրտէրեան էր: Ան Տէրտէրեանը դարձրուց Կիւլեր, որպէսզի թուրք հասարակութեան մէջ համարկումը հեշտ ըլլայ:
Ֆրանսական պարբերականները կը գրեն` Արա Կիւլերը իր արուեստին մէջ կը միաւորէր տարբեր մշակոյթները, կը պահպանէր սուր ընկալումը այն բարդ աշխարհին, ուր կ՛ապրէր: 22 տարի ան Yeni İstanbul թերթի լուսանկարիչ-լրագրողն էր, յետագային դարձաւ Time ամսագրի Մերձաւոր արեւելեան առաջին թղթակիցը, երբ պարբերականը 1958-ին սկսաւ աշխատելու Թուրքիոյ մէջ:
«Կիւլերին որոշ չափով նման է ժամանակակից նկարիչ Սարգիս Զապունեանը: Ան ծնած է 1938-ին Թուրքիա, իսկ 1964-էն կ՛ապրի Փարիզ: 2015-ին ան Թուրքիան ներկայացուց Վենետիկի ցուցահանդէսին»,– կը գրէ թերթը:
Կիւլեր բազմաթիւ հեղինակաւոր մրցանակներու դափնեկիր է, լուսանկարչական սարքեր արտադրող գերմանական Leica ընկերութիւնը անոր նաեւ «վարպետ» տիտղոսը շնորհած է: 2000-ին ստացած է Ֆրանսայի պետական բարձրագոյն մրցանակը` Պատուաւոր լեգէոնի շքանշանը: Յայտնի լուսանկարիչը մահացած է 2018-ի Հոկտեմբերին 90 տարեկանին:
