Այս ալ, քանիերորդ անգամ ըլլալով, դարձեալ վարագոյրը վեր կ’առնուի 2001 թուականի 9/11-ի ողբերգական դէպքին վրայէն, երբ երկու օդանաւեր հարուածեցին Նիւ Եորքի World Trade Center-ի զոյգ աշտարակները, որոնք երկվայրկեաններու ընթացքին փուլ եկան, աւելի քան 3000 հոգիի մահուան պատճառ դառնալով:
Վարագոյրը վեր կ’առնուի, բացայայտելու համար աշխարհը ցընցող այդ «ահաբեկչական» արարքին ետին թաքնուած իրականութիւնը, ցուցակ մը ամբողջ փաստերով, գիտական, քաղաքական վերլուծութիւններու հիմանց վրայ:
Փաստագրողները կ’ըսեն. «Միջուկը պարապ ալիւմինէ օդանաւեր անկարելի էր որ պողպատեայ այդ կառոյցներուն մէջ մխրճուէին եւ 7 երկվայրկեաններու ընթացքին շէնքերը ստուարաթուղթէ շինուած խաղալիք տնակներու նման փոշիի վերածէին, եթէ շէնքերուն մէջ կանխատեղադրուած «օժանդակ» պայթուցիկներ չըլլային»:
Կ’ըսեն, յարձակումէն օր մը առաջ, «որոշ» անձեր պարպած են իրենց գրասենեակները. կ’ըսուի նաեւ, որ այդ օր շէնքերուն մէջ աշխատող հրեայ պաշտօնեաներ եւ գործատէրեր բացակայ եղած են…:
Այս իմաստով մէկէ աւելի ֆիլմեր ալ պատրաստուած են, ուր յըստակ կերպով կը տեսնուին օդանաւերու շէնքերուն հպելուն հետ, վարի յարկերէն սկսած պայթումները: Կը տեսնուի նաեւ, թէ ինչպէ՛ս նախագահ Պուշ, որ ուրիշ քաղաքի մը մէջ դպրոց մը կ’այցելէր, երբ բօթաբերը դասարան մտաւ ու իր ականջին փսփսաց, հաղորդելով պայթումներուն լուրը, Պուշ բնաւ չայլայլեցաւ ու չցնցուեցաւ…:
Ամերիկան պատրուակ կը փնտռէր ներխուժելու համար որոշ երկիրներ, ինչպէս Աֆղանիստան եւ Իրաք ու պատճառը կամ պատըրուակը պատրաստուեցաւ գաղտնի սպասարկութեանց խոհանոցներուն մէջ: Սովորաբար նախ պատճառ մը կ’ըլլայ, որուն կը հետեւի այդ պատճառին հակազդեցութիւնը, սակայն քաղաքականութեան մէջ, այս եզրը շրջուած է, նախ հակազդեցութիւնը կը ծրագրուի, ապա պատճառ մը կը գտնուի կամ կը յերիւրուի` հակազդեցութիւնը արդարացնող, անշուշտ հակազդեցութիւն ըսելով, հասկնալու է գլխաւոր նպատակը:
Ամերիկան անմիջապէս ահաբեկչութեան դէմ պատերազմ յայտարարեց եւ աշխարհի պետութիւններուն կոչ ըրաւ «Կա՛մ մեզի հետ, կա՛մ մեզի դէմ»: Ըլլալիքը յստակ էր` աշխարհը բաժնել երկու մասի, Մ. Նահանգներուն կողմ անցնողները «արդարներն» էին, իսկ չանցնողները` «մեղաւորները», որոնք դատապարտուած էին պատժամիջոցներու, ընդհուպ, մինչեւ ներխուժումի եւ գրաւման:
Անշուշտ այսպիսի «բաց պատարագ»ի մը ի տես եւ ի լուր, խաշած հաւն անգամ կը ծիծաղէր, սակայն ոչ ոք ծիծաղեցաւ ու ամերիկային պոչը բռնողները հլու-հնազանդ հետեւեցան իրենց «վարպետ»ին երկիրներու քանդումին ու հարիւր հազարաւորներու սպանութեան:
Գիտէինք, որ քաղաքականութիւն ըսուածը պոռնկութեան նման բան մըն է եւ այս օրերուն` բաց ու թափանցիկ, սակայն անոր այս աստիճան աներես ու ժպիրհ ըլլալը չէինք գիտեր: Նիւ Եորքի Համաշխարհային Առեւտրական կեդրոնի զոյգ աշտարակներուն փլուզումին ետին թաքնուած գաղտնիքը եթէ հասանելի դարձած է, մեզի պէս մարդոց, ուրեմն պետութիւններ վաղուց գիտեն իրականութիւնը, բայց ինչո՛ւ կը լռեն, հո՛ս է հարցը:
ԽԱՂԱԹՈՒՂԹ…
Պետութիւնները խաղաթուղթեր ունին, ոմանք կը բացուին, ոմանք ալ պահ կը դրուին, ի պահանջեալ հարկին օգտագործուելու համար, որպէս սպառնալիք, որպէս սակարկութեանց համար անհրաժեշտ զէնք:
Պետութիւնները կը խաղան ու իրենց խաղերուն ընթացքին ինչե՜ր կը տրորեն…
Յակոբ Միքայէլեան
