Հայաստանի Հանրապետութեան Զինուած Ուժերու կազմաւորման 25-ամեակին առիթով՝ Հայաստանի Հանրապետութեան Պաշտպանութեան Նախարարի հրամանով գանատահայոց Թեմի Առաջնորդ Գերաշնորհ Տ. Աբգար Եպիսկոպոս Յովակիմեանը պարգեւատրուեցաւ «Անդրանիկ Օզանեան» շքանշանով:
Գերշ. Տ. Աբգար եպս. Յովակիմեանը (աւազանի անունը` Սամուէլ) ծնած է 1972 թ. Յուլիսի 23-ին, Բաթում քաղաքի մէջ, ապա 2014 թուականին գանատահայոց Թեմին կողմէ ընտրուած եւ ապա Ամենայն Հայոց Հայրապետ Ն.Ս.Օ.Տ.Տ. Գարեգին Բ. Կաթողիկոսին կողմէ նշանակուած է Գանատայի թեմի առաջնորդ: Գանատայի հայոց թեմը հաստատուած է 1984 թուականին՝ Ն.Ս.Օ.Տ.Տ. Վազգէն Ա. Ծայրագոյն Պատրիարք եւ Ամենայն Հայոց Կաթողիկոսի Սրբատառ կոնդակով: Թեմին մէջ ներկայիս կը գործեն տասնութ եկեղեցական համայնքներ:
Մոնթրէալի ՌԱԿ Էօժէն Բաբազեան Վարչութեան, Թէքէեան Մշակութային Միութեան Վարչութեան եւ «ԱՊԱԳԱՅ» Շաբաթաթերթին անունով կը շնորհաւորենք Բարեխնամ եւ ժրաջան Առաջնորդ Սրբազան Հայրը, շարունակական բեղուն գործունէութիւն մաղթելով իրեն, ի պայծառութիւն Գանատահայ Թեմին եւ Հայաստանեայց Առաքելական Սուրբ Եկեղեցւոյ:
