Եռօրեայ ճանաչողական այցով Հայաստան ժամանած են 17 զբօսաշրջային գործարկուներ (operator) Իսրայէլէն: ՀՀ տնտեսական զարգացման եւ ներդրումներու նախարարութեան հաղորդմամբ: Ուրբաթ՝ 2 Յունիսին, անոնք հանդիպած են հայաստանեան զբօսաշրջային գործարկուներու հետ: Հանդիպման ներկայ գտնուած է Հայաստանի մէջ Իսրայէլի պատուաւոր հիւպատոս Աշոտ Շախմուրադեան:
ՀՀ տնտեսական զարգացման եւ ներդրումներու նախարարութեան Զբօսաշրջութեան պետական կոմիտէի նախագահ Զարմինէ Զեյթունցեան կարեւոր համարած է Հայաստանի եւ Իսրայէլի միջեւ զբօսաշրջութեան ոլորտի մէջ համագործակցութիւնը:
«Կը գտնենք, որ երկու երկիրներու միջեւ զբօսաշրջային այցելութիւններու աշխուժացումը բացի տնտեսական նշանակութենէն ունի նաեւ երկու ժողովուրդներու միջեւ միջ մշակութային երկխօսութեան, ժողովուրդներու բարեկամութեան ամրապնդման եւ զարգացման նշանակութիւն»,-ըսած է ան:
Հանդիպման ընթացքին քննարկուած են Հայաստանի եւ Իսրայէլի միջեւ զբօսաշրջութեան բնագաւառի մէջ յետագայ համագործակցութեան ամրապնդման ուղղուած հարցեր: Կողմերը փոխանակուած են անհրաժեշտ տեղեկութիւններով` յետագային համագործակցութիւնը առաւել աշխուժացնելու նպատակով:
17 զբօսաշրջային գործարկուներու այցը Հայաստան կազմակերպուած է «Արմենիա» օդանաւային ընկերութեան կողմէ:
