Հայաստան միացած է Եւրոմիութեան հետազօտութեան եւ նորարարութեան ֆինանսաւորման «Հորիզոն 2020» ծրագիրին: Համապատասխան համաձայնագիրը կնքուած է Հինգշաբթի՝ 19 Մայիս 2016-ին, Պրիւքսէլի մէջ Հայաստանի կառավարութեան եւ Եւրոպական յանձնաժողովի միջեւ:
«Հայաստանի մասնակցութիւնը «Հորիզոն 2020»-ին` ԵՄ-ի Հետազօտութեան եւ Նորարարութեան շրջանակային ծրագրին, անկասկած նոր հեռանկարներ կը բացի Հայաստանում ակադեմիական մտքի զարգացման համար` վերահաստատելով հայերի` եւրոպական քաղաքակրթութեան բաղկացուցիչ մաս լինելը»,- ըստ «Մետիամաքս»-ի՝ յայտարարած է Լեւոն Մկրտչեան:
ՀՀ կրթութեան եւ գիտութեան նախարարին խօսքով` համաձայնագրի արդիւնքները Հայաստանին թոյլ պիտի տան միջազգային չափանիշներուն համապատասխան գիտական հետազօտութիւններ իրականացնելու` ներգրաւելով բարձր որակաւորում ունեցող հետազօտողներ, խթանելու գիտահետազօտական ենթակառուցուածքներու զարգացումը, բարձրացնելու հետազօտութեան եւ նորարարութեան ոլորտի մէջ ներդրումներու մակարդակը:
Եւրոպական հարեւանութեան եւ ընդլայնման հարցերով յանձնակատար Եոհաննէս Հանը նշած է, որ Հայաստանի միացումը «Հորիզոն 2020»-ին Հայաստանի հետ յարաբերութիւնները ընդլայնելու ԵՄ յանձնառութեան յստակ օրինակ է:
Ծրագիրին միջոցով Հայաստանի հետազօտական հիմնարկները եւ մասնաւոր ոլորտը հնարաւորութիւն պիտի ունենան ֆինանսաւորում ստանալու առաջնակարգ հետազօտութիւններու իրականացման եւ գիտութեան զարգացման համար:
«Հորիզոն 2020» ծրագիրին միանալու համաձայնագրի նախապատրաստման մէջ ընգրկուած են Պոլոնիոյ գործընթաց, բարձրագոյն կրթական հաստատութիւններու հաւատագրման գործընթացը, Թեմփուս, Էրազմուս, ԵՄ 7-րդ շրջանակային ծրագիրները:
Ծրագիրին ընկերակից անդամակցութեան համար Հայաստանը իւրաքանչիւր տարի պէտք է կատարէ ֆինանսական ներդրում:
«Հորիզոն-2020»-ին Հայաստանի ընկերակից անդամակցութեան համաձայնագրի կնքման վերաբերեալ բանակցութիւնները մեկնարկած էին 2013 թուականի Յուլիսին:
