Յունուար 11-ին ՄԱԿ-ի մէջ ՀՀ մշտական ներկայացուցիչ, դեսպան Զոհրապ Մնացականեան ընտրուած է կազմակերպութեան Զարգացման ծրագիրի (ՄԱԶԾ), Բնակչութեան հիմնադրամի (ՄԱԲՀ) եւ Ծրագիրներու իրականացման գրասենեակի (ՄԱԾԻԳ) Գործադիր խորհուրդի նախագահ` մէկ տարի ժամկէտով:
ԱԳՆ մամուլի ծառայութեան փոխանցած տեղեկութիւններով` անդամ պետութիւններու ներկայացուցիչներէն բաղկացած Գործադիր խորհուրդը միաձայն հաւանութիւն տուած է դեսպան Զոհրապ Մնացականեանի թեկնածութեան: ՄԱԿ-ի Գլխաւոր Ասամպլէայի կողմէն տրուած իրաւագիրին համաձայն` Գործադիր խորհուրդի հիմնական գործառոյթներն են յիշեալ երեք գործակալութիւններուն միջկառավարական աջակցութեան տրամադրումն ու գործունէութեան ընդհանուր վերահսկողութեան իրականացումը: Խորհուրդի պարբերական նստաշրջանները կը գումարուին տարեկան երեք անգամ, որոնց ընթացքին Խորհուրդի կողմէն կը քննարկուին եւ որոշումներ կը կայացուին օրակարգային հարցերու շուրջ` տարբեր երկիրներու մէջ գործակալութիւններու ծրագիրներու արդիւնաւէտ կատարումը ապահովելու նպատակով:
«2016 թուականը Գործադիր խորհրդի եւ գործակալութիւնների համար առանցքային տարի է լինելու զարգացման նոր օրակարգի իրականացման առումով. մեկնարկելու են միջազգային հանրութեան կողմից ամիսներ առաջ ընդունուած կայուն զարգացման նպատակների իրագործմանն ուղղուած աշխատանքները: Առաջիկայ տարին յատկանշական է նաեւ գործակալութիւնների Ռազմավարական ծրագրերի միջնաժամկէտ վերանայման, ինչպէս նաեւ ՄԱԿ զարգացման համակարգի արդիւնաւէտութեան գնահատմանն ուղղուած անդամ-երկրների հիմնական քաղաքական գործիքի` Քաղաքականութեան քառամեայ համապարփակ դիտարկման գործընթացի տեսանկիւնից` ի թիւս այլ կարեւոր օրակարգային հարցերի»,- իր խօսքին մէջ նշած է դեսպան Զոհրապ Մնացականեան:
Նշենք, որ ՄԱԿ-ի Զարգացման ծրագիրի (ՄԱԶԾ), Բնակչութեան հիմնադրամի (ՄԱԲՀ) եւ Ծրագիրներու իրականացման գրասենեակի (ՄԱԾԻԳ) Գործադիր խորհուրդը, որուն Հայաստանը կ՝անդամակցի 2014 թուականէն, 2015-ի Յունիսին հաստատած է ՄԱԿ-ի Զարգացման ծրագիրի ու Բնակչութեան հիմնադրամի հայաստանեան նոր ծրագիրները (2016-2020թթ.):
