«Մայր Թերեզա… քիչերուն յայտնի է, որ մարդկութեան այս հազուագիւտ ծաղիկը կրած է Ագնեսա Պոյաջեան անունը, այսինքն` եղած է հայուհի (այդ մասին 88-ի երկրաշարժէն ետք գալով Հայաստան` ինքը Վազգէն Ա-ին պատմած է, ես այս մասին լսած եմ Արցախի թեմի առաջնորդ Պարգեւ արքեպիսկոպոս Մարտիրոսեանէն): Հրաչուհի Փալանդուզեանի այս գրառումը տարածուած էր համացանցի մէջ:
«Հայերն այսօր»-ը այս լուրին իսկութիւնը ճշտած է Պարգեւ Սրբազանէն: Արցախի թեմի առաջնորդը հաստատած է լուրի ճշմարտացիութիւնը եւ ըսած, որ Վազգէն Առաջինը ատիկա յայտնած է Մայր Թերեզայի հետ հանդիպումէն ետք. «1988 թուականի Սպիտակի երկրաշարժէն յետոյ, երբ Մայր Թերեզան ժամանած էր Հայաստան, հանդիպեցաւ նաեւ Վազգէն Առաջինի հետ: Հանդիպումի ընթացքին Մայր Թերեզան կաթողիկոսին պատմած է իր հայկական ծագման մասին: Անոր իսկական ազգանունը Պոյաջեան է, հայրը Արեւմտեան Հայաստանէն գաղթած է Ալպանիա, մայրն ալ ալպանուհի քրիստոնեայ է: Իսկ հանդիպումէն անմիջապէս ետք, երբ 20-25 միաբաններով հաւաքուած էինք, Վազգէն Առաջինը, որուն լուրը ոչ միայն ուրախացուցած էր, այլ նաեւ զարմացուցած, այդ մասին պատմեց մեզի»:
Աւելցնենք, որ Մայր Թերեզա Կալկաթացիի իսկական անունը Ագնէս Գոնջա Պոյաջիու է, ալպաներէն` Agneze Gonxhe Bojaxhiu: 1931 թուականին իր կամքով կուսակրօնութեան ուխտ ընդունելով` 21 տարեկանին ստացած է Թերեզա անունը` ի պատիւ 1927 թուականին սուրբերու շարքը դասուած ֆրանսացի միանձնուհի Թերեզայի (Թերեզա Լիզյեցի), որ յայտնի էր իր բարութեամբ եւ գթասրտութեամբ:
Մայր Թերեզան Խաղաղութեան Նոպէլեան մրցանակի դափնեկիր է (1979): Կաթոլիկ եկեղեցին դասած է զայն երանելիներու շարքը: Մահացած է Կալկաթա, 1997-ի Սեպտեմբեր 5-ին, 87 տարեկանին:
