Ամերիկահայ մեծահարուստ Քերոլին Ռաֆայէլեանը ընդգրկուած է Forbes ի` աշխարհի ամենահարուստ ինքնուրոյն կայացած կանանց ցուցակին մէջ` զբաղեցնելով 22-րդ տեղը: Ինչպէս կը հաղորդէ «Արմենփրես»-ը, Քերոլինի կարողութիւնը կը գնահատուի 700 միլիոն տոլար:
Ան ոսկերչութեան մէջ առաջինն է ԱՄՆ-ի մէջ ինքնուրոյն կայացած ամենահարուստ կանանց շրջանին մէջ: 2004 թուականին ան հիմնած է «Alex and Ani» ոսկերչական զարդերու ընկերութիւնը` անուանելով զայն իր երկու դուստրերուն անուններով: Զարդերուն արժէքը ցած պահելու նպատակով ընկերութիւնը կ՛օգտագործէ վերամշակուած նիւթեր: «Alex and Ani» ընկերութիւնը ներկայիս ունի 65 խանութ: Մինչեւ 2015 թուականը ընկերութեան վաճառքը հասած է 500 միլիոն տոլարի:
Forbesի` աշխարհի ամենահարուստ ինքնուրոյն կայացած կանանց ցուցակը կը գլխաւորեն Տայեան Հենդրիքսը (4,9 միլիառ տոլար), Օփրայ Ուինֆրին (3,2 միլիառ տոլար) եւ Ճուդի Ֆոլկնըրը (2.4 միլիառ տոլար): Ցուցակին մէջ ներառուած են նաեւ Մատոննան (25-րդ հորիզոնական, 560 միլիոն տոլար), Սելին Դիոնը (37-րդ հորիզոնական, 380 միլիոն տոլար), Պարպարայ Սթրէյզանտը (38-րդ հորիզոնական, 370 միլիոն տոլար), Ճեսիքա Ալպան (42-րդ հորիզոնական, 340 միլիոն տոլար),Պէյոնսեն (56-րդ հորիզոնական, 265 միլիոն տոլար), Թէյլըր Սուիֆթը (60-րդ հորիզոնական, 250 միլիոն տոլար):
