2016-ին 2015-ի համեմատ ՀՀ օդակայաններուն մէջ արձանագրուած է ուղեւորահոսքի 10.4 տոկոս աճ կամ ուղեւորահոսքի տարբերութիւնը կազմած է մօտ 200.000 մարդ:
2016-ի Յունուար-Դեկտեմբեր ամիսներուն «Զուարթնոց» օդակայանին ուղեւորահոսքը կազմած է 2.105.540 մարդ` 2015-ի ուղեւորահոսքը գերազանցելով 12 տոկոսով։ Այս մասին կը տեղեկացնէ Քաղաքացիական թռիչքուղիներու գլխաւոր վարչութիւնը:
2016-ին «Զուարթնոց» օդակայանի ուղեւորահոսքը հատած է 2 միլիոնի շեմը` 1992-էն ի վեր արձանագրելով ամենաբարձր ցուցանիշը: 2016-ին Երեւանէն մեկնած է 1.048.153 ուղեւոր եւ ժամանած է 1.057.387 ուղեւոր, իսկ 2015-ին մեկնածներուն թիւը կազմած է 944.373 ուղեւոր, ժամանածներունը` 935.294 ուղեւոր:
2016-ին ժամանող ուղեւորներուն քանակը շուրջ 8500-ով գերազանցած է մեկնող ուղեւորներու քանակին: 2016 թուականի Դեկտեմբեր ամսուն ուղեւորահոսքը կազմած է 189.018 մարդ` արձանագրելով 23.4 տոկոս աճ նախորդ տարուան նոյն ամսուան ցուցանիշին համեմատ:
«Զուարթնոց» օդակայանին մէջ 2016-ին բեռնափոխադրումը կազմած է 18.269 թոն ապրանք, որ 80,4 տոկոսով աւելին է, քան 2015-ին:
2016-ին «Զուարթնոց» օդակայանին մէջ տեղի ունեցած է 9266 թռիչք-վայրէջ` արձանագրելով 2,8 տոկոս աճ նախորդ տարուան ցուցանիշներուն համեմատ:
Ութ ամսուան դադարէ յետոյ վերագործարկուած Գիւմրիի «Շիրակ» օդակայանին մէջ 2016-ին ուղեւարահոսքը կազմած է 12.421 ուղեւոր, բեռնափոխադրումը` 4.2 թոն ապրանք: 2016 թուականի Դեկտեմբեր ամսուն ուղեւարահոսքը կազմած է 2557 մարդ:
