Կայացաւ «Վահան Թէքէեան» ամէնամեայ միջազգային մրցանակաբաշխութիւնը։ Արդէն 30-րդ անգամ անցկացուող մրցանակաբաշխութեան շնորհիւ Միութիւնը գնահատում եւ խրախուսման է արժանացնում գրականութեան, մշակոյթի եւ գիտութեան տարբեր բնագաւառների լաւագոյններին։
Այս տարի մրցանակ յանձնուեց 5 անուանակարգում՝ Գրականութիւն, Հայագիտութիւն, Կերպարուեստ, Դեկորատիւ-կիրառական արուեստ եւ Վահան Թէքէեանին նուիրուած աշխատութեան համար։ Մրցոյթին մասնակցելու յայտ էր ներկայացրել շուրջ 50 մասնակից. յանձնաժողովն ընտրել է դրանցից լաւագոյններին:
«Գրականութիւն» անուանակարգում յաղթողը բանաստեղծ Խաչիկ Մանուկեանն է՝ «Անմահականս» գրքի համար, «Հայագիտութիւն» անուանակարգում՝ բանասիրական գիտութիւնների դոկտոր, փրօֆէսօր Սուրէն Դանիէլեանը՝ «Օշականի ստեղծագործական հիմնախնդիրները․ մեկնութիւն եւ «Մանրուքներ» գրքի համար։ «Կերպարուեստ» անուանակարգի յաղթողը գեղանկարիչ Տիգրան Բարխանաճեանն է՝ «Խաղաղութեան իշխան» ստեղծագործութեան համար, իսկ Դեկորատիւ-կիրառական արուեստ անուանակարգում յաղթողը ժողովրդական վարպետ Մամիկոն Մխթարեանն է՝ «Ուրարտական շրջանի ոգով» ստեղծագործութիւնների համար։ Վահան Թէքէեանին նուիրուած աշխատութեան «Վահան Թէքէեան» մրցանակ շնորհուեց բանասիրական գիտութիւնների թեկնածու Վարդուհի Դաւթեանին՝ «Վահան Թէքէեան» յօդուածների ժողովածուի Ա եւ Բ հատորների համար։ Յաղթողներն արժանացան Վահան Թէքէեան մրցանակի եւ 1500 ԱՄՆ տոլարին համարժէք դրամ։ Մրցանակաբաշխութիւնն անցկացւում է ԱՄՆ եւ Գանատայի «Ագապի Շաքէ Ղազարեան հիմնադրամ»-ի ֆինանսական աջակցութեամբ։
Ներկաները դիտեցին «Աղօթք Հայաստանի համար» ֆիլմը, որի հեղինակն ու ռեժիսորը Աշոտ Պօղոսեանն է։ Ֆիլմը իւրատեսակ հոգեւոր ուղերձ է, ինչպէս նաեւ միասնական լինելու, մաքրագործուելու, պատմական ու ժամանակակից մարտահրաւէրները յաղթահարելու կարեւորագոյն կոչ։ Ֆիլմում առանձնայատուկ տեղ ունի հոգեւոր արժէքներին վերադառնալու, աղօթքի միջոցով խաւարից լոյս փնտռելու անհրաժեշտութիւնը՝ վերահաստատելով, որ ազատութեան ճանապարհը սկսւում է ներքին վերափոխումից: Մայր Աթոռ Սուրբ Էջմիածնի կողմից իր օրհնութիւնը յղեց Նաթան արքեպիսկոպոս Յովհաննիսեանը։ Նա իր ուրախութիւնը յայտնեց, որ հայրենիքի ու ժողովրդի համար այս դժուարին օրերին, երբ ունենք չամոքուած վէրքեր ու ցաւեր, Թէքէեան միութիւնը շարունակում է իր ջանքերը ուղղել հայ գրականութեան ու մշակոյթի առաջընթացին։ Սրբազան Հայրը շնորհաւորեց մրցանակակիրներին, որոնք իրենց գործունէութեամբ վաստակել են այս մեծանուն պարգեւը՝ ի սէր սեփական հայրենիքի ու ժողովրդի, լեզուի ու ընտանիքի։
Հայաստանի Թէքէեան մշակութային միութեան նախագահ, ՀՀ մշակոյթի վաստակաւոր գործիչ, փրօֆէսօր Ռուբէն Միրզախանեանը շնորհաւորեց մրցանակակիրներին եւ շնորհակալութիւն յայտնեց մրցութային յանձնաժողովների նախագահներին՝ անաչառ ընտրութեան համար: Նա կարեւորեց այն հանգամանքը, որ պահպանուել է մրցանակաբաշխութեան կարեւոր պահանջը՝ ազգային բովանդակութիւնը։
Ռուբէն Միրզախանեանն իր խօսքում նշեց, որ յատկապէս այս օրերին պէտք է մշակոյթն արժեւորել, ստեղծագործել, պահպանել ազգայինը, ազգային կրթութիւնն ու դպրոցը․ հենց այդ ձգտումներին է միտուած «Վահան Թէքէեան» մրցանակաբաշխութիւնը։
«Գրականութիւն» անուանակարգի յանձնաժողովի նախագահ, ԳԱԱ թղթակից անդամ, բանասիրական գիտութիւնների դոկտոր, փրօֆէսօր Աելիտա Դոլուխանեանն ընդգծեց՝ Խաչիկ Մանուկեանի գիրքը կարծես ռեքվիէմ լինի՝ նուիրուած 44-օրեայ պատերազմի բոլոր նահատակներին։
«Կարծես լսելի են հետաքրքիր ձայներ՝ մեր ազգային մեծերի երաժշտութիւնը։ Դա արդիական եւ սթափեցնող գիրք է՝ արժանի մեծ գրող Վահան Թէքէեանի անունը կրող մրցանակի․ նա երջանիկ կը լինէր, որ իր անուան մրցանակը ստանում է Խաչիկ Մանուկեանի «Անմահականս» գիրքը»,-նշեց Աելիտա Դոլուխանեանն ու շնորհաւորեց մրցանակակրին։
«Վահան Թէքէեան» մրցանակակիր, պատմական գիտութիւնների դոկտոր Ամատունի Վիրաբեանը բարձր գնահատեց Սուրէն Դանիէլեանի գիրքը եւ ընդգծեց, որ յանձնաժողովի կարծիքով՝ այն խորը վերլուծական աշխատանք է Յակոբ Օշականի վերաբերեալ։ Նրա կարծիքով՝ գիրքը կը զարդարի գրականագիտութեան ասպարէզը եւ ապագայ սերունդների համար հիմք կը լինի հետագայ գիտական աշխատանքների համար։
«Վահան Թէքէեան» մրցանակակիր, արուեստագիտութեան դոկտոր, փրօֆէսօր Արա Յակոբեանը երկար տարիներ գլխաւորում է Կերպարուեստ եւ Դեկորատիւ-կիրառական անուանակարգերի յանձնաժողովները։ Խոստովանում է՝ իր համար մեծ պատիւ է «Վահան Թէքէեան»-ի անունը կրող մրցանակի յանձնաժողովների նախագահը լինելը։ Նա շնորհաւորեց անուանակարգերում մրցոյթի բոլոր մասնակիցներին, քանի որ մրցանակաբաշխութեանն ընդառաջ ունեցել են նաեւ իւրատեսակ ցուցադրութիւն մէկ յարկի ներքոյ։ Խօսելով մրցանակակիր Տիգրան Բարխանաճեանի մասին՝ Արա Յակոբեանը նշեց, որ աստուածաշնչեան թեմաներով ստեղծագործելը դժուարին գործ է։ «Աշխատանքի մեծաչափ օրինակը ցուցադրւում է Վեհարանում․ դա արդէն իսկ մեծագոյն գնահատական է»,-յաւելեց Արա Յակոբեանը։ Անդրադառնալով Դեկորատիւ-կիրառական անուանակարգի յաղթող Մամիկոն Մխիթարեանի արուեստին՝ Արա Յակոբեանը բարձր գնահատեց, որ ժողովրդական վարպետը մետաղի մշակման բարդ ճիւղով կարողանում է պահպանել եւ փոխանցել միջնադարեան գեղարուեստական ճիւղը։
Այս տարի «Վահան Թէքէեան» մրցանակ էր նախատեսուած նաեւ արեւմտահայ գրողի մասին գիտական աշխատութեան համար։ «Թէքէեան կենտրոն» հիմնադրամի տնօրէն Արմէն Ծուլիկեանը մրցանակը յանձնեց բանասիրական գիտութիւնների թեկնածու Վարդուհի Դաւթեանին՝ Վահան Թէքէեան յօդուածների ժողովածուի Ա եւ Բ հատորների համար։ Արմէն Ծուլիկեանն իր գոհունակութիւնը յայտնեց նման բացառիկ աշխատանքի համար եւ նշեց․ «Վահան Թէքէեան»ի պոեզիան բազմիցս հրատարակուել է, սակայն Թէքէեան խմբագրին եւ հրապարակախօսին այսկերպ ներկայացնելը եւ բացայայտելը, երբ ժամանակագրական կարգով հաւաքագրւում է Թէքէեանի հրատարակչական, հրապարակախօսական գործունէութիւնը, եզակի է։ Թէքէեան կենտրոնն ու Թէքէեան միութիւնը շարունակելու են իրենց գործունէութեամբ հետամուտ լինել Թէքէեանի կեանքի եւ գործունէութեան ներկայացմանն ու տարածմանը»։
Մրցանակակիրները շնորհակալութիւն յայտնեցին իրենց գործունէութիւնը բարձր գնահատականի արժանացնելու համար, քանի որ «Վահան Թէքէեան» մրցանակը պատուաբեր եւ պարտաւորեցնող մրցանակ է։
Մրցանակաբաշխութեանը կատարումներով հանդէս եկաւ Արցախի ազգային նուագարանների պետական նուագախումբը։
Հայաստանի Թէքէեան Մշակութային Միութեան լրատուական ծառայութիւն
Քրիստինէ Մելքոնեան
