Գանատայի վարչապետ Ճասթին Թրիւտօ յայտնեց, որ գանատական կազը Գերմանիա արտածելը դիւրին պիտի չըլլայ, նոյնիսկ եթէ Պերլին ուզէ Ռուսիայէն իր կախեալութիւնը նուազեցնելու համար կազի մատակարարման աղբիւրները դարձնել բազմազան:
Թրիւտօ Մոնթրէալի մէջ Գերմանիոյ վարչապետ Օլաֆ Շոլցի հետ մամլոյ միացեալ ասուլիսի ընթացքին հեղուկ բնական կազի արտածման կարելիութիւնը նկատեց քիչ հաւանական` մատնանշելով Գանատայի արեւմուտքը գտնուող կազի հանքերուն եւ Ատլանտեան ովկիանոսի վրայ գտնուող նաւահանգիստներուն միջեւ հեռաւորութիւնը:
«Մենք կարելիութիւնները կը սերտենք գիտնալու համար, թէ հեղուկ բնական կազի արտածումը տրամաբանակա՞ն է, եւ զայն ուղղակի դէպի Եւրոպա արտածելը օգուտ ունի՞», աւելցուց Թրիւտօ:
Գերմանիոյ վարչապետը իր կարգին յայտնեց, որ Գերմանիան կ’արագացնէ նաւահանգիստներու ենթակառոյցներու եւ կազի խողովակներու կառուցումը` հեղուկ բնական կազի ներածումները աւելցնելու համար, եւ Գանատայի նման երկիրներու նկատմամբ դրական տրամադրուած է:
