Կոչ ենք անում ընտրել Նիկոլ Փաշինեանին. ՌԱԿ

Հայրենական սահմանների հետագայ անձեռնմխելիութիւնը երաշխաւորուած տեսնելու նախանձախնդրութեամբ,
Երկրի տնտեսական Կացութեան հետագայ վատթարացումը կանխելու մտահոգութեամբ,
Համայն հայութեանը՝ Հայաստան, Արցախ եւ Սփիւռք, համախմբելու ձգտումով.

Ռամկավար Ազատական Կուսակցութիւնը, իր հայաստանեան եւ սփիւռքեան կառոյցների համախոհութեամբ կոչ է անում՝

Յառաջիկայ Մայիսի 1-ին ՀՀ Ազգային ժողովի նիստում Նիկոլ Փաշինեանին ընտրել հանրապետութեան վարչապետի պաշտօնում եւ նրան պարտականութիւն տալ, Սահմանադրութեան համաձայն, ձեռնամուխ լինել ժամանակաւոր նոր կառավարութեան կազմութեանը՝ պետական կառոյցների աշխատանքը անխափան շարունակելու առաջադրանքով։

Ռամկավար Ազատական Կուսակցութիւնը կոչ է անում Նիկոլ Փաշինեանին՝

ա) Գործել միմիայն Սահմանադրութեան եւ օրէնքների շրջանակներում եւ վեր չդասուել օրէնքից՝ ինչ էլ որ լինեն իրեն շրջապատող զանգուածների պահանջները,

բ) Սահմանադրութեամբ նախատեսուող բոլոր պարագաներում սերտօրէն համագործակցել Հայաստանի Հանրապետութեան նախագահի, Արցախի Հանրապետութեան նախագահի, իսկ ազգային-համահայկական կարեւորագոյն հարցերում՝ նաեւ Ամենայն Հայոց Հայրապետի հետ։

գ) Օրէնսդրական համապատասխան գործիքների կիրառմամբ ձեռնարկել Ազգային ժողովի ցրման գործընթաց եւ Հանրապետութեան նախագահին առաջարկել նշանակել արտահերթ ընտրութիւններ։

դ) Մինչ այդ ԱԺ նախագահութեանը առաջարկել ձեռնարկել ընտրութիւնների մասին ՀՀ օրէնքի բարեփոխման գործընթաց՝ այն համապատասխանեցնելով իսկական ժողովրդավարական չափանիշներին՝ բացառապէս համամասնական կարգով ընտրելիութիւն, ելակէտային հաւասար պայմաններ բոլոր կուսակցութիւնների համար, Կենտրոնական ընտրական նոր յանձնաժողովի ստեղծում՝ ապակուսակցական սկզբունքով, ամենախիստ վերահսկողութիւն սահմանել ընտրութիւններում ծախսուող գումարների վրայ։

ե) Օրէնստրօրէն ապահովել Հանրապետութեան նախագահի իրաւասութիւնների ընդլայնումը՝ երկրի ղեկավարման հիմքում դնելով իշխանութեան տարբեր թեւերի միջեւ հակակշռման սկզբունքը, նուազեցնելով վարչապետի գերհզօր լիազօրութիւնները։

ՌԱԿ-ը համոզուած է, որ այս եւ հետագայ օրինական քայլերի կիրառմամբ միայն հնարաւոր կը լինի ժողովրդի իշխանութիւնը տարածել մեր ողջ երկրի վրայ, ապահովել պետութեան կայուն եւ ապահով զարգացումը բոլոր բնագաւառներում։

ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹԵԱՆ

ԿԵԴՐՈՆԱԿԱՆ ՎԱՐՉՈՒԹԻՒՆ ԳԵՐԱԳՈՅՆ ԽՈՐՀՈՒՐԴ

Յակոբ Աւետիքեան – Ատենապետ

Վարդան Նազիրեան – Ատենապետ