Հայաստանի մէջ ԱՄՆ դեսպանութիւնը կը յայտնէ, որ 2019-ի ընթացքին ԱՄՆ կառավարութեան աջակցութիւնը Հայաստանին շարունակած է աւելնալ: Ինչպէս «Արմենփրես»-ը կը հաղորդէ, այս տարի անիկա կազմած է 60 միլիոն ԱՄՆ տոլար, որ նախորդ տարուան համեմատ 40 տոկոսով աւելի է:
Այս ֆինանսաւորումը ԱՄՆ արտաքին գործոց նախարարութեան եւ ԱՄՆ միջազգային զարգացման գործակալութեան կողմէ տնօրինուող ծրագիրներէն զատ, կը ներառէ նաեւ ԱՄՆ ուժանիւթի, անտառային ծառայութեան եւ պաշտպանութեան բաժանմունքներու ծրագիրները:
ԱՄՆ կառավարութիւնը այս միջոցներով աջակցած է Հայաստանի մէջ ժողովրդավարական զարգացման բազմաթիւ ծրագիրներու, մասնաւորապէս` փտածութեան դէմ պայքարի, անվտանգութեան, ուժանիւթի, կրթութեան, անգլերէնի ուսուցման, անտառային ծառայութիւններու, մարդու իրաւունքներու, քաղաքացիական հասարակութեան, եւ պետական կառավարման թափանցիկ ու հաշուետու հաստատութիւններու ամրապնդման, ինչպէս նաեւ` իրաւապահ, արդարադատութեան եւ դատաիրաւական ոլորտներու մէջ:
«Միացեալ Նահանգները վերջին 27 տարիներուն աջակցած է Հայաստանի ժողովրդավարական գործընթացներուն եւ հաստատութիւններու զարգացման, եւ մենք մտադիր չենք փոխել ատիկա յատկապէս այժմ, երբ ժողովրդավարութիւնը, նախկինէն աւելի ամուր է Հայաստանի մէջ: Նոյն այս պատճառով ալ հպարտութեամբ կը փաստենք, որ այս տարի աջակցութիւնը կը կազմէ աւելի քան 60 միլիոն ԱՄՆ տոլար», – կը նշուի Հայաստանի մէջ ԱՄՆ դեսպան Լին Թրէյսի:
1992-էն սկսած Միացեալ Նահանգները Հայաստանի յատկացուցած է աւելի քան 2 միլիառ ԱՄՆ տոլարի աջակցութիւն` բարելաւելու ժողովուրդի կենսապայմանները եւ աջակցելու ժողովրդավարական, տնտեսական եւ ընկերային կառավարման ամրապնդման ուղղուած ջանքերուն:
