Երեքշաբթի՝ 7 Մայիս 2024-ին, Ուրուկուէյի Ծերակուտականներու պալատը միաձայնութեամբ թեր քուէարկած է իւրաքանչիւր տարի Ապրիլի 24-ը «Հայոց Ցեղասպանութեան յիշատակի օր» հռչակող օրէնքի նախագիծին, որ պետական բոլոր պատկերասփիւռի եւ ձայնասփիւռի կայաններուն կը պարտաւորեցնէ իւրաքանչիւր տարուան Ապրիլ 24-ին միաժամանակ անդրադառնալ Հայոց ցեղասպանութեան նիւթին:
«Արմէնփրէս»-ի հաղորդումով` Ուրուկուէյի մէջ Հայաստանի դեսպանութեան «Facebook»-ի էջը կը տեղեկացնէ, որ նիստի ընթացքին ելոյթներով հանդէս եկած ծերակուտականները, որոնք ներկայացուցած են տարբեր քաղաքական կուսակցութիւններ, վերահաստատած են Հայաստանի եւ հայ ժողովուրդի հանդէպ իրենց բարեկամական վերաբերմունքը, մարդկութեան դէմ գործուած նման յանցագործութիւնները մոռացութեան չմատնելու կարեւորութիւնը, շեշտած են յարգուած եւ սիրուած հայ համայնքի հանգամանքը: Ծերակուտականները նշած են, որ Հայաստանը այսօր ալ անվտանգային մարտահրաւէրներու առջեւ կանգնած է եւ յիշեցուցած, որ 2022 թուականին Ծերակոյտը նաեւ միաձայն դատապարտած է Բերձորի միջանցքի շրջափակումը եւ իր համերաշխութիւնը յայտնած է Լեռնային Ղարաբաղի ժողովուրդին:
