Մոսկուայի մէջ օրեր առաջ մեկնարկած է «Մի երկրաշարժի պատմութիւն» ֆիլմի նկարահանումը: Ֆիլմը արտադրող «Մարս մետիա» ընկերութեան ղեկավար Ռուբէն Տիշտիշեան, ըստ Panorama.am-ի` kinopoisk.ru կայքին ներկայացուցած է ֆիլմի մասին մանրամասներ:
Ֆիլմի սիւժէն կը զարգանայ 1988 թուականի Դեկտեմբեր 7-ին Հայաստանի մէջ տեղի ունեցած երկրաշարժէն ամենաշատը տուժած Գիւմրի քաղաքին մէջ: Ռ. Տիշտիշեանի խօսքով, Լենինականի երկրաշարժը ԽՍՀՄ-ի պատմութեան մէջ վերջին իրադարձութիւններէն էր, որ միաւորած էր համայն խորհրդային ժողովուրդը: Տիշտիշեանը եղած է այդ իրադարձութիւններու անուղղակի մասնակիցը. երկրաշարժի յաջորդ օրը ընկերներու հետ գացած է Լենինական, օգնած փրկարարներուն` յոյս ունենալով, որ աւերակներու տակէն հնարաւոր է գտնել ողջ մնացած մարդոց: «Մենք Հայաստանի հետ կապուած որեւէ բան նկարահանելու մտադրութիւն ունէինք, բայց 1988 թուականի երկրաշարժի մասին մենք չէինք մտածել: Երբ Անդրէասեան եղբայրները մեզ մօտ եկան սցենարը ձեռքներին, մենք հասկացանք, որ դա շատ լաւ նախագիծ է, քանի որ այն Հայաստանում տեղի ունեցած ողբերգական իրադարձութեան մասին է, կարելի է անել հանդիսատեսի լայն շրջանակներին հետաքրքրող, մեծ կինօ»,- ըսած է Ռ. Տիշտիշեան:
«Մի երկրաշարժի պատմութիւն» ֆիլմը ստեղծողները կը մտածեն զուգահեռաբար նկարահանել վաւերագրական ֆիլմ 1988 թուականի դէպքերուն մասին: Ֆիլմին մէջ յատկապէս կը պատմեն աղէտի հետեւանքներուն մասին` աւերուած քաղաք, մարդկային ցաւ, կորսուած հարազատներ, փրկարարական գործողութիւններ:
Ֆիլմին մէջ կը նկարահանուին Կոնստանդին Լաւրոնենգոն, Մարիա Միրոնովան, Արտեոմ Պիսդրովը: Հայ դերակատարներու ընտրութեան փուլը տեւած է կէս տարի:
«Վճռական որոշում էինք ընդունել, որ հայ հերոսներին պէտք է մարմնաւորեն հայեր»,- ըսած է Ռ. Տիշտիշեան:
Ֆիլմին մէջ պիտի նկարահանուին Վիքթոր Ստեփանեանը, Տաթեւիկ Յովակիմեանը, Միքայէլ Պօղոսեանը, Հրանդ Թոխատեանը, Սօս Ջանիբեկեանը:
Մոսկուայի մէջ նկարահանումները կ՝ընթանան լքուած գործարանի տարածքին:
Նոյեմբերին նկարահանումներ պիտի ըլլան նաեւ Գիւմրիի մէջ: Ֆիլմի ստեղծման համար 100 հազար տոլար յատկացուցած է Հայաստանի մշակոյթի նախարարութիւնը, Կինոյի ֆոնտը: Ֆիլմի ստեղծողները ֆիլմը դիտելէ ետք պիտի որոշեն փառատօնային ճակատագիրը: Կ’ակնկալուի, որ ֆիլմի վերջնական տարբերակը պատրաստ ըլլայ յաջորդ տարուան Օգոստոսին, պաստառին յայտնուի Դեկտեմբեր 7-ի մօտ օրերուն:
«Ինձ թւում է, որ ֆիլմում կայ եւ կոմերցիոն, եւ փառատօնային պոտենցիալ: Այսինքն օգոստոսից դեկտեմբեր բոլոր փառատօները կը լինեն մեր ուշադրութեան կենտրոնում: Միաժամանակ մենք կը ցանկանայինք ներկայացնել ֆիլմը «Օսկար»-ի Հայաստանի կողմից»,- ըսած է ֆիլմը արտադրողը:
