Bloomberg պարբերականը կազմած է Եւրոպայի մէջ զբօսաշրջութեան մէջ արագ քայլերով աճող երկիրներու տասնեակը, ուր ներառուած է նաեւ Հայաստանը: Ինչպէս կը հաղորդէ «Արմենփրես»-ը, պարբերականը զրուցած է Cox & Kings զբօսաշրջային ընկերութեան ամերիկեան մասնաճիւղի տնօրէն Ուորըն Չանկի հետ, որ բացայայտած է Եւրոպայի մէջ այն 10 երկիրները, ուր զբօսաշրջութիւնը կը զարգանայ արագ քայլերով: Ուորըն Չանկ տասնեակը ներկայացուցած է` հիմնուելով երկիրներու մէջ զբօսաշրջութեան ոլորտի տարեկան աճի տուեալներուն հիմանվրայ:
Խօսելով Հայաստանի մասին ` ան նշած է, որ Հայաստանի մէջ զբօսաշրջութեան ոլորտի տարեկան աճը կազմած է 18.65 տոկոս: Չանկ 2019-ի ճամբորդական հետաքրքրական ուղղութիւններէն մէկը կը համարէ Հայաստանը: Ան յայտնած է, որ Cox & Kings ընկերութիւնը կը ծրագրէ յառաջիկայ քանի մը շաբաթներու ընթացքին Հայաստանը Վրաստանի հետ կապող նոր երթուղի ներդնել: Ուղղութիւնը սպասարկող զբօսաշրջային ընկերութիւններու շարքին են Abercrombie & Kent, Ker & Downey եւ TCS World Travel ընկերութիւնները, որոնք հաւաքական ուժերով կը գովազդեն Հայաստանի մասին խորհրդանշող այնպիսի արժէքներ, ինչպիսիք են Արարատ լեռը, Հայաստանի սքանչելի մայրաքաղաք Երեւանը: Կը նշուի նաեւ, որ Abercrombie & Kent-ի միջոցով ճամբորդելու պարագային հիւրերը նաեւ կ՛այցելեն տեղական քոնեակի եւ գինիի գործարանները, կը հանդիպին գորգեր արտադրողներու հետ, կ՛ունկնդրեն հոգեւոր երաժշտութիւն հին վանական համալիրներու մէջ, հայկական ընտանիքի հետ կը մասնակցին լաւաշ թխելու արարողութեան:
Հայաստան կը զբաղեցնէ պարբերականի ներկայացուցած տասնեակի վերջին տեղը: Առաջինը Սան Մարինոն է, երկրորդը` Վրաստանը, իսկ երրորդը Իսրայէլն է: Տասնեակին մէջ են նաեւ Թուրքիան, Իսլանդիան, Մակեդոնիան, Ատրպէյճանը, Մոլտովան եւ Պոսնիա եւ Հերցեգովինան:
