ՌԱԿ 95-Ամեակի Տօնական Համերգ
Յառաջիկայ Ուրբաթ օրը, Հոկտեմբեր 7-ին, ժամը 19.00-ին, Օփերայի եւ պալէտի ազգային թատրոնի դահլիճում տեղի կունենայ տօնական համերգ նուիրուած Ռամկավար Ազատական Կուսակցութեան 95-ամեայ յոբելեանին:
Ծրագրում
– Թաթուլ Ալթունեանի անուան երգի-պարի պետական անսամպլ
– Հայաստանի պարարուեստի «Բարեկամութիւն» պետական անսամպլ
– Գէորգ Տապաղեան եւ տուտուկահարների խումբ
– Հայաստանի պարի պետական անսամպլ
– Հատուածներ Տիգրան Չուխաճեանի «Արշակ Բ.», «Կարինէ», Արմէն Տիգրանեանի «Դաւիթ Բէկ» օփերաներից: Մենակատարներ՝ Դաւիթ Բաբայեանց, Միքայէլ Յովակիմեան, Յովհաննէս Ներսէսեան, նուագակցութեամբ օփերայի եւ պալէտի թատրոնի նուագախմբի ու երգչախմբի: Տիրիժոր՝ Յարութիւն Արզումանեան:
Համերգի ընթացքում կը ցուցադրուի ՌԱԿ-ի պատմութեան մասին վաւերագրական 10 ռոպէանոց վաւերագրական ֆիլմ երջանկայիշատակ Խորէն Աբրահամեանի ընթերցմամբ:
ՌԱԿԸ ԱԿՏԻՒՕՐԷՆ ՄԱՍՆԱԿՑՈՒՄ Է ՏԻՄ ԸՆՏՐՈՒԹԻՒՆՆԵՐԻՆ
2016թ. Օգոստոսին Ռամկավար Ազատական Կուսակցութեան Հանրապետական վարչութիւնը որոշում ընդունեց ակտիւ մասնակցութիւն ունենալ Տեղական ինքնակառավարման մարմինների ընտրութիւններին, եւ կուսակցութեան շրջանային կառոյցները ակտիւօրէն լծուեցին այդ ծրագրի իրականացման գործին: Վերջին 2 ամիսներին ՌԱԿ վարչութեան անդամները պարբերաբար հանդիպումներ են անցկացնում շրջաններում կուսակցութեան կողմից ընտրութիւնների համար առաջադրուած թեկնածուների հետ հանդիպման, առկայ խնդիրների քննարկման ու համապատասխան լուծումների առաջարկման համար:
ՌԱԿ-ի համար ՏԻՄ ընտրութիւններին մասնակցելը մարտավարական նշանակութեան խնդիր է’ պայմանաւորուած թէ’ ակտիւ քաղաքականութիւն վերադարձով եւ թէ սեփական ուժերը, յատկապէս համապետական ընտրութիւններից առաջ, ստուգելու համար: Մասնակցութիւնը ընտրութիւններին նաեւ կարեւոր է որպէսզի կուսակցութեան անդամները տեղերում մասնակցելով փորձ եւ հմտութիւն ձեռք բերեն գարնանը սպասուելիք ընտրութիւններին ընդառաջ:
ՌԱԿ Հանրապետական վարչութեան հերթական այցը Գեղարքունիքի եւ ապա Վայոց Ձորի մարզեր նպատակ էր հետապնդում տեղում տեսնելու ձեւաւորուած կուսակցական թիմերի աշխատանքը յատկապէս ընտրութիւններից մի քանի օր առաջ:
Մինչ այդ կուսակցութեան վարչութեան անդամները հանդիպումներ էին անցկացրել Լոռու մարզի Սպիտակ քաղաքում, Եղվարդում, Վանաձորում: Յիշեցնենք, որ ՏԻՄ ընտրութիւնները կը կայանան յառաջիկայ Կիրակի օրը, Հոկտեմբերի 2-ին:
Նշենք, որ ՌԱԿ այս աշխատանքը մեծ ոգեւորութիւն է առաջացրել նաեւ կուսակցութեան սփիւռքեան կառոյցներում, որ շատ անդամներ այս օրերին լինելով Երեւանում ցանկութիւն են յայտնել միանալ այս հանդիպումներին եւ իրենց ներկայութեամբ ոգեւորել կուսակցութեան հայաստանեան անդամներին:
Գեղարքունիք եւ Վայոց Ձոր կատարած այցերին կուսակցութեան փոխատենապետներ Կարէն Կակոյեանին եւ Արմէն Մանուէլեանին միացաւ նաեւ ՌԱԿ Վերականգնումի եւ միութեան վարչութեան ատենապետ Վարդան Նազիրեանը Լոս Անեճելըսից:
Առաջին հանդիպումը Սեւան քաղաքում էր, որտեղ կայացաւ հանդիպում ՌԱԿ-ի կողմից առաջադրուած թեկնածու Նորիկ Խալաֆեանի եւ կուսակցութեան ակտիւի այլ անդամների հետ, որոնք այս օրերին ծաւալել են նախընտրական քարոզչական եռանդուն գործունէութիւն: Հանդիպման ընթացքում Ն. Խալաֆեանը շեշտեց, որ քարոզարշաւն ընթանում է նախատեսուած հունով եւ այն հնարաւորութիւն է տուել նաեւ միաւորել կուսակցութեան անդամներին եւ ակտիւացնել նրանց գործունէութիւնը Սեւանում:
Յաջորդ հանդիպումը Վարդենիս քաղաքում էր, որտեղ Հանրապետական վարչութեան անդամները եւ Վարդան Նազիրեանը հանդիպեցին կուսակցութեան տեղական կառոյցի անդամների հետ: Հանդիպմանը ներկայ էր ՌԱԿ տեղական ակումբի ատենապետ Դաւիթ Դաւթեանը եւ կուսակցութեան կողմից աւագանու թեկնածու առաջադրուած Վարդան Դաւթեանը: Հանդիպման ընթացքում քննարկուեց ՏԻՄ ընտրութիւնների նախապատրաստական աշխատանքների ընթացքը, ինչպէս նաեւ Վարդենիս քաղաքում ընտրութիւններից առաջ ստեղծուած քաղաքական դասաւորութիւնները եւ կուսակցութիւնների ակտիւութիւնը, ինչպէս նաեւ ՌԱԿ-ի թեկնածուի հնարաւորութիւնները՝ յաղթելու յառաջիկայ ընտրութիւններում:
ՌԱԿ յառաջիկայ քաղաքական եւ տնտեսական գործունէութեան մասին կարճ ելոյթով հանդէս եկաւ նաեւ ՌԱԿ Վերականգնումի եւ Միութեան շարժման ատենապետ Վարդան Նազիրեանը:
Շարունակելով սկսուած ճանապարհորդութիւնը, ՌԱԿ պատուիրակութիւնը մեկնեց Վայոց Ձոր եւ անցնելով գեղատեսիլ Վարդենեանց լեռնանցքով հասաւ Եղեգնաձոր, որտեղ կուսակցութեան տեղական ակտիւը ատենապետ Արտաշ Այվազեանի գլխաւորութեամբ լայնածաւալ միջոցառումների, այդ թւում համերգային երեկոյ էին կազմակերպել քաղաքի բնակչութեան համար՝ նախընտրական քարոզարշաւի շրջանակներում:
Կուսակցութեան տեղական ակտիւի հետ հանդիպման ժամանակ վերջիններս հաւաստիացրին, որ լայնածաւալ քարոզչական աշխատանք են իրականացրել, տրամադրուած են մարտական ու համոզուած, որ կուսակցութեան Եղեգնաձոր քաղաքի աւագանու իրենց թեկնածու Արտաշ Այվազեանը յաղթանակ կը տօնի:
Երեկոյեան ՌԱԿ պատուիրակութիւնը վերադարձաւ Երեւան այն համոզմունքով, որ յառաջիկայ ընտրութիւնները վճռական ու յաջողակ կը լինեն կուսակցութեան համար:
