2019 Յունուար ամսուայ սկիզբը Հ.Հ. Արտաքին գործերու նախարար պրն. Զոհրապ Մնացականեանի հրամանագրով եւ Գանատայի կառավարութեան վաւերացումով Պրն. Վարուժան Լափոյեան նշանակուեցաւ Օնթարիօ նահանգի պատուակալ հիւպատոս:
Չորեքշաբթի Մարտ 27, 2019-ի երեկոյեան ժամը 8.00ին Թորոնթոյի հայ կեդրոնի մէջ տեղի ունեցաւ ծանօթացման երեկոյ մը, Օնթարիոյի նորանշակ պատուակալ հիւպատոս, բարերար եւ գործարար պրն. Վարուժան Լափոյեանի հետ:
Ներկայ էին գաղութիս մէջ գործող եկեղեցիներու, բարեսիրական, մշակութային, երեք աւանդապահ կուսակցութիւններու ներկայացուցիչները:
Բացման խօսքով հանդէս եկաւ օրդ. Սարիկ Պապեան, բարի գալստեան խօսքերով ողջունեց, օրուայ պատուոյ հիւրը եւ ներկաները, ապա հակիրճ կերպով անդրադարձաւ պատուոյ հիւպատոսի կենսագրութեան:
Իրենց քաջալերական, յաջողութեան սրտի խօսքերով հանդէս եկան Գերշ. Տ. Բաբգէն Արք. Չարեան, Գանատայի մէջ Հ.Հ. հիւպատոս պրն. Արա Մկրտիչեան եւ պրն. Սեւակ Քիւփէլեան: Հանդիսավարուհին հրաւիրեց պատուոյ հիւպատոս պրն. Վարուժան Լափոյեանին փոխանցելու իր սրտի խօսքը: Ան շնորհակալութիւն յայտնեց ձեռնարկը կազմակերպողներուն, եւ բոլոր ներկաներուն:
Այս պատեհ առիթէն օգտուելով, պատուակալ հիւպատոսին հետ, մտերմիկ զրոյց ունեցան Ռ.Ա.Կ.-ի, Թէքէեան Մշակ. Միութեան եւ «Ապագայ» շաբաթաթերթի Թորոնթոյի պատասխանատուներէն պրն. Գէորգ եւ տիկ. Շողիկ Թիւթիւնճեան, պրն. Սարգիս Չիլինկիրեան եւ պրն. Մատաթ Բ. Մամուրեան, յաջողութիւններ մաղթեցին իր ստանձնած առաքելութեանը:
Երեկոն շարունակուեցաւ «Wine & Cheese»ի հիւրասիրութեամբ:
Կը շնորհաւորենք Պրն. Վարուժան Լափոյեանը իր ստանձնած պատասխանատու այս պաշտօնին համար եւ կը մաղթենք որ ան դառնայ բեղուն եւ ընթանայ հեզասահ ի խնդիր հայրենիքի ու սփիւռքի ընդհանրապէս եւ Օնթարիոյի մասնաւորապէս հզօրացման:
