Ռամկավար Ազատական Կուսակցութիւնը կը պատրաստուի Հայաստանի մէջ Ապրիլ ամսուն տեղի ունենալիք ընտրութեանց

-Մօտ օրերս սպասւում է Գագիկ Ծառուկեանի շուրջ ձեւաւորուող դաշինքի անդամ կուսակցութիւնների մասնակցութեամբ համաձայնագրի ստորագրում, որոնցից մէկը, ինչպէս աւելի վաղ յայտարարուել է, ՌԱԿ-ն է։ Վերջին օրերին կուսակցութիւնում այս առումով խորհրդակցութիւններ են, աւելի յստակութիւն մտա՞ւ դաշինքի հետ համագործակցութեան հետ կապուած։

-Նախորդ շաբաթավերջին, ճիշդ էք, ունեցանք Կեդրոնական վարչութեան

երկօրեայ նիստեր։ Առաւել դրան՝ մենք երկու հեռախօսաժողովներ ենք ունեցել

Սփիւռքի մեր ընկերների հետ, միմեանց հետ պարզեցրել ենք մեր

տեսակէտները։ Որոշումը, ճիշդ է, մերն է, բայց նրանց տեսակէտը նոյնպէս կարեւոր է, որովհետեւ նոր պէտք չէ բացատրել՝ մենք ցանցային կուսակցութիւն ենք։ Ճիշդ է՝ Կեդրոնական վարչութիւնը գտնւում է Հայաստանում, բայց պէտք է խորհրդակցել դրսի կառոյցների եւ յատկապէս ՌԱԿ Գերագոյն խորհրդի հետ։ Եւ մենք, խորքային քննարկումներից յետոյ որոշեցինք միանալ Գագիկ Ծառուկեանի գլխաւորած դաշինքին։

Արդէն իսկ աշխատանքներ ենք կատարում՝ տեղերում ունենալու մեր շտապները եւ ռէյթինկային թեկնածուներին, արդէն վճռել ենք նրանց կազմը։ Տեսնում ենք բոլոր պատրաստութիւնները, որպէսզի կարողանանք արժանապատիւ կերպով ներկայացնել ե՛ւ մեր կուսակցութեան, եւ դաշինքի ընդհանուր տեսակէտները ժողովրդին։ Այս առումով պէտք է մեկնաբանեմ մեր ընտրութեան իմաստը, պատճառաբանեմ դաշինքին միանալու պարագան։

Այստեղ հաշուի առնուեց մի քանի հանգամանք։ Նախ, ինչպէս պրն Ծառուկեանն է ձեւակերպել, ինքը ներկայանում է ընտրութիւններին Հայաստան-Արցախ-Սփիւռք միասնութեան դիրքերից։ Ճիշդ է, Սփիւռքն իրաւունք չունի մասնակցելու քուէարկութիւններին, բայց բարոյական առումով խիստ կարեւոր է այդ եռամիասնութեան դիրքերից հանդէս գալը։ Գ․ Ծառուկեանի նպատակաուղղուածութիւնը դէպի այս եռամիասնութիւնը ոչ միայն զարգացնելուն, այլեւ արդիւնաւորելուն է ծառայելու, որովհետեւ հայութիւնը մէկ ամբողջութիւն է, եւ սա նոյնական է մեր 95-ամեայ գաղափարախօսութեանը, դա մեր կուսակցութեանը հոգեհարազատ է։ Երկրորդ. Ծառուկեանի գլխաւորած դաշինքը ոչ թէ ջղաձիգ կեցուածք կամ արտայայտութիւններ է թոյլ տալիս, այլ կառուցողական երկխօսութեան կողմնակցութիւն, որը մեզ համար շատ արժէքաւոր է՝ քաղաքական համախոհութիւն ստեղծելու պետական եւ ազգային կարեւորագոյն հարցերում։ Երրորդ․ նա արտագաղթի հոսանքի առաջն առնելու մտահոգութիւն ունի, որը նաեւ մեր մտահոգութիւնն է։ Առաւել եւս՝ մենք կարծում ենք, որ արտագաղթը ոչ միայն հնարաւոր է կասեցնել, ճիշդ ուղղութեամբ քայլեր ձեռնարկելով, այլ նաեւ յիշեցնեմ՝ ՌԱԿ-ը մի կազմակերպութիւն է, որը 1946-47 թուականներին գլխաւորել է ներգաղթի շարժումը, այնպէս որ՝ այսօր իսկապէս պէտք է ընդհակառակը՝ ներգաղթի՛ համար հող ստեղծենք, արտագաղթածներին, սփիւռքահայութեանը (նաեւ Ռուսաստանը նկատի ունեմ) հետ վերադարձնելու հայրենիք։ Այս երկրի ապագան իր հողում ապրող ժողովուրդն է։ Ծառուկեանի մատնանշած այս ուղղութիւնները մեզ համար խիստ գրաւիչ են։

-«Ոչ ջղաձիգ» բառն օգտագործեցիք, բայց քաղաքական դաշտն, իրօք, հիմա ջղաձգուում է, փոխադարձ խանդ կայ, դաշինքների ձեւաւորման գործընթացն ուղեկցուում է տարբեր խարդաւանքներով։ Այս առթիւ յիշեմ Ձեր հարցազրոյցն 1in․am-ին, Յունուարի 24-ին, որտեղ Դուք դաշինքներ կազմելու տարբեր դրսեւորումների առումով ասել էիք, թէ իւրաքանչիւր քաղաքական կազմակերպութիւն աշխատում է ինչքան հնարաւոր է շատ թուով մարդկանցով խցկուել ապագայ խորհրդարան՝ հաւանաբար նկատի ունենալով ամենաանհաւանական միաւորումները։ Յետոյ փորձեր եղան այդ «խցկուել» բառը կապել Ձեր կուսակցութեան ընտրութեան հետ։

– Ճշդեմ, որ այդ հարցազրոյցը Յունուարի 24-ից աւելի վաղ եմ տուել, այդ ժամանակ մենք դեռեւս վերջնականապէս չէինք կողմնորոշուել։ Եւ լրագրողի հարցերին պատասխանել եմ նախ որպէս լրագրող, եւ ինչ որ տեղ՝ որպէս մեկնաբան։ Իմ դիտարկումները եղել են դաշինքներ կազմելու այդ օրերի աժիոթաժի եւ այն ուռճացնելու, գաղափարական նոյնութիւնները նկատի չառնելու եւ ապագայ Ազգային ժողովում տեղ գտնելու ձգտումի վերաբերեալ։ Ես բացատրել եմ պատկերաւոր կերպով։ Անպարկեշտ բան է լրագրութեան տեսակէտից՝ համատեքստից դուրս վերցնել տարբեր մտքեր եւ ըստ սեփական յարմարութեան՝ վերնագիր սարքել, այնինչ համատեքստում այդ մտքերի նշանակութիւնն այլ էր։ Իսկ մեր կուսակցութեան վերջնական որոշումը կայացրել ենք շատ աւելի ուշ՝ նկատի ունենալով «Ծառուկեան դաշինքի  բոլոր այն մօտեցումները, որոնք հոգեհարազատ են մեզ։

-Այդ դէպքում վերադառնանք 1in.am-ի նոյն զրոյցին, որտեղ ասում էք, թէ Ծառուկեանը ցոյց է տուել, որը ինքը կարողանում է մարդաշատ խմբաւորում ապահովել, հետեւաբար արժանի է, որ լուրջ մօտենանք այդ քաղաքական անձնաւորութեանը։

-Ես ոչ միայն այդ կարծիքին եմ, այլ յիշեցնեմ, որ մէկ այլ հարցազրոյց էլ եմ տուել այդ նոյն օրերին, մինչեւ մեր դիրքորոշումը յստակեցնելը Ծառուկեան դաշինքին միանալու առումով, lurer.com-ին, որտեղ խօսել եմ զուտ ընտրական թեմայով։ Եւ ապագայ խմբակցութեան շահերից ելնելով, ասելով, թէ պրն․ Ծառուկեանի գլխաւոր առաւելութիւններից մէկն այն է, որ այլ քաղաքական գործիչների նման ժողովրդի վստահութեան քուէն, տրուած ձայները փոշիացնողը չէ։

Իսկ ինչ վերաբերում է սփիւռքի ՌԱԿ տեղական կառոյցներին, պէտք է ասեմ, որ տեղական ընտրական հարցերում իւրաքանչիւր շրջանակ ինքն է որոշում իր անելիքը, քանի որ բոլորից աւելի լաւ ինքը գիտի իր տեղական պայմաններն ու քաղաքական դասաւորումները։ Աւելի յստակեցնելու համար ասեմ, օրինակ, որ յառաջիկայ Մայիս ամսին Լիբանանում տեղի են ունենալու խորհրդարանական ընտրութիւններ, եւ ՌԱԿ տեղի կառոյցը ինքն է որոշելու իր մասնակցութեան ձեւն ու կերպը։