«Թէքէեան Կեդրոն» հիմնադրամը, ի մի բերելով իր 2022 թուականի գործունէութեան արդիւնքները, առաջ է շարժւում, հաւատարիմ մնալով իր առաքելութեանը, եւ շարունակում տարիներով ձեւաւորուած մարդասիրական, մշակութային, կրթական ծրագրերի իրականացման քաղաքականութիւնը: Բացառութիւն չէր նաեւ 2022 թուականը, որի ընթացքում եւս իրականացուեցին բազմաթիւ բարեգործական ծրագրեր:
Անցեալ տարուայ մշակութային կարեւոր ձեռքբերումների շարքին է դասւում Վարդուհի Դաւթեանի կողմից հաւաքագրուած «Վահան Թէքէեան. Յօդուածների ժողովածու» եռահատոր հրատարակութեան առաջին գրքի տպագրութիւնը, ճանաչուած երգահան Պերճ Թիւրաբեանի եւ երգչուհի Նայիրի Գասպարեանի «Հայու հոգին. արեւմտահայ բանաստեղծները երգերում» խորագրով երաժշտական երեկոն, Հ. Թումանեանի թանգարանի հետ համագործակցութեամբ՝ Զոհրապ Ըռքոյեանի հեղինակած «Հայկական Քաշաթաղ» ցուցահանդէսը, «ԱԲԳ-ն եւ ընկերները» ցուցահանդէսը՝ Հայաստանի երգիծանկարիչների միութեան հետ համատեղ եւ մի շարք այլ միջոցառումներ: Հիմնադրամը հովանաւորել է նաեւ ՀԹՄՄ «Վահան Թէքէեան» ամէնամեայ միջազգային մրցանակաբաշխութեան «Գեղարուեստական լուսանկարչութիւն» անուանակարգը:
Հիմնադրամը հիւրընկալել եւ օժանդակել է տարբեր կազմակերպութիւնների՝ իրականացնելու գրքի շնորհանդէսներ «Մաղաւուզ», հեղինակ՝ Լեյնադ Դանիէլեան, «Ազգային ինքնութեան ակունքները», հեղինակ՝ Համլէտ Մարտիրոսեան, հեղինակներ՝ Ամատունի Վիրաբեան, Սոնիա Միրզոյեան/, ցուցահանդէսներ /Վիկտոր Դանիլովի անհատական ցուցահանդէսը, «Իմ ժամանակի մեծերը», հեղինակ Անատոլի Աւետեան/, կինոդիտում/ «Երկընտրանք», ռեժիսոր՝ Կարէն Գէորգեան/:
Կրթութեան ոլորտի հանդէպ հիմնադրամի ընդգծուած ուշադրութիւնը աւանդական է դարձրել սկսած 2010 թ.-ից: 2022-ին եւս իրականացուել է «Անվճար դասագրքեր 2022/2023» ծրագիրը, որի շրջանակում Երեւանի, Գիւմրիի, Ստեփանաւանի եւ Կարբի գիւղի՝ Վահան Թէքէեանի անուան դպրոցների 150 անապահով աշակերտներին դասագրքեր են անվճար տրամադրուել: ԹԿՀ աջակցել է նաեւ «Յակոբ Պօղոսեան կրթաթոշակ – 2022» շարադրութիւնների մրցոյթի կազմակերպմանը, ինչպէս նաեւ տեխնիկական օժանդակութիւն է տրամադրել Պարոյր Սեւակ գիւղի դպրոցին:
44-օրեայ պատերազմից ի վեր իրականացուող «Օգնութիւն Արցախի մեր հայրենակիցներին» ծրագրի շրջանակում ողջ տարուայ ընթացքում շարունակուել է մարդասիրական աջակցութիւնը Արցախից տեղահանուած եւ Չարենցաւան, Հրազդան համայնքներում բնակութիւն հաստատած 338 ընտանիքի. տրամադրուել է շուրջ 14,5 տոննա ընդհանուր ծաւալով սննդամթերք եւ տնտեսական պարագաներ:
Ամփոփելով՝ նշենք, որ սրանք իրականացուած ծրագրերի միայն որոշ մասն են, 2023 թուականին նոյնպէս շարունակուելու են գործունէութեան թիրախում մնալ հիմնադրամի գաղափարների ու մօտեցումների իրականացման ուղղութիւնները:
