Հայաստանի ֆութպոլի ֆետերասիոնի ֆութպոլի ակադեմիային մէջ մեկնարկը տրուեցաւ Հայաստանի ֆութպոլի ֆետերասիոնին եւ ՖԻՖԱ-ի հիմնադրամին միասնաբար կազմակերպած «ՖԻՖԱ-ի հիմնադրամի Ճամբար-Հայաստան 2021» ծրագիրին:
Հայաստանը ՖԻՖԱ-ի հիմնադրամին կողմէ ընտրուած է իբրեւ ծրագիրը իրականացնող առաջին երկիրը:
Հիմնադրամի տնօրէնն է Ֆրանսայի ֆութպոլի ազգային հաւաքականին հետ աշխարհի եւ Եւրոպայի ախոյեան հանդիսացած Եուրի Ճորքայէֆ, որ Երեւանի մէջ տուաւ ծրագիրին մեկնարկը:
Ֆետերասիոնի ֆութպոլի ակադեմիային մէջ տեղի պիտի ունենայ մէկ շաբթուան ճամբար` անապահով ընտանիքներու, ծնողազուրկ, հաշմանդամ երեխաներու, ազգային փոքրամասնութիւններու ներկայացուցիչներու եւ Արցախէն տեղահանուած ընտանիքներու` նախապէս ընտրուած 12-14 տարեկան 100 երեխաներու համար:
Ծրագիրին առաջին օրը մասնակից երեխաները եկան ֆետերասիոնի ակադեմիան, կատարեցին բժշկական քննութիւն եւ ստացան ՖԻՖԱ հիմնադրամին կողմէ տրամադրուած մարզական հագուստներ եւ նուէրներ:
