Զուտ ազգային, ապաքաղաքական երթ՝ դէպի Ծիծեռնակաբերդ
Հայաստանի գերլարուած ներքաղաքական վիճակը բեւեռացրել է ողջ քաղաքացիական հասարակութեանը՝ բեւեռացման ալիքը տարածելով աշխարհով մէկ։ Ներքին կացութեանը սպառնացող նոր բարդութիւնները եւ նրանց հետեւանքների գիտակցութիւնը մտահոգում եւ տագնապեցնում է համայն հայութեանը, հայրենիքում թէ սփիւռքում։ Մտատանջութիւնների այդ վիճակում՝ արդէն գտնւում ենք Ապրիլի 24-ի սեմին, Մեծ եղեռնի նահատակների յիշատակի օրուայ նախօրէին։
Յաւերժական արժէքները պէտք չէ չափուեն օրուայ քաղաքական կացութեամբ ու ներքաղաքական իրավիճակներով, որքան էլ որ դրանք լինեն դժուարին ու բարդ։ Սրբազան նահատակների կտակը վեր է ու պէտք է վեր մնայ քաղաքական բոլոր նկատառումներից։ Հայոց Ցեղասպանութեան յիշատակի օրը պարտադրաբար պէտք է դառնայ ազգի համախմբման եւ վերապրելու կամքի նուիրական հանգրուան։
Կոչ ենք անում մեր ժողովրդի բոլոր հատուածներին, որ ներկայ պահին, հասկանալով հանդերձ խռովութիւնների ողջ՝ ներքին, հասարակական ու քաղաքական պատճառները, Ապրիլի 24-ը վերածելու հակադիր բեւեռների միջեւ փոխադարձ հանդուրժողականութեան, միասնաբար՝ մեր կորուստների, մեր հայրենազրկման, մեր միլիոնաւոր նահատակների զոհաբերութիւնը ըմբռնելու, արժեւորելու, ազգային մեր գերագոյն կեցութեան՝ պետականութիւնը պաշտպանելու օրուայ։
Միասնաբար պէտք է առիթ տանք մեր հարիւր հազարաւոր հայրենակիցներին, որպէսզի այդ օրը դէպի Մեծ եղեռնի յուշարձան՝ Ծիծեռնակաբերդ բարձրանան առանց ատելութիւնների, թօթափելով, գէթ մէկ օր, ներքին բոլոր տարակարծութիւններն ու ատելութիւնները, զերծ պահելով մեր ժողովրդին իշխանական թէ ընդդիմադրական բոլոր տեսակի ամբիցիաներից, որպէս իսկական հայ մարդիկ, որոնք մտածում են, խորհրդածում եւ կշռադատում մեր ժողովրդի ու պետութեան անցեալի ու ապագայի մասին։ Նահատակների յիշատակի ոգեկոչման օրը վերածենք խոկումի ու խորհրդածութեան առիթի, յուսալով ու բաղձալով, որ ներկայ անել թուացող կացութեանը կը գտնուի իմաստուն ելք։
Բողոքի, ցասման եւ ընդվզման ոչ մէկ արտայայտություն չի կարող ունենալ ազգային ու համամարդկային աւելի մեծ նշանակութիւն եւ արժէք, որքան Ցեղասպանութեան դէմ բողոքի մեր համազգային երթը դէպի Ծիծեռնակաբերդ։
ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹԻՒՆ
ԳԵՐԱԳՈՅՆ ԽՈՐՀՈՒՐԴ
ԿԵՆՏՐՈՆԱԿԱՆ ՎԱՐՉՈՒԹԻՒՆ
Երեւան 23 Ապրիլ 2018 թ.
